Tikū Leitovys golvyspiļsātā Viļņā aizvadeits NATO samits, kas jau kaidu šaļti pyrma tuo radeja švuorbys par varbyutejū drūšeibys situacejis pasaslyktynuošonu iz kūpejuo Baļtejis vaļstu austrumu rūbeža. Taipat pādejā laikā iz Latvejis-Boltkrīvejis rūbeža teik izdareits arviņ leluoks spīdīņs. Tai, par pīmāru, aizvadeitajā trešdīnē rūbežsardze nūvārsuse 30 cylvāku raudzeišonu nalykumeigi škārstuot Latvejis-Boltkrīvejis rūbežu. Itūgod jau vysā nu nalykumeigys Latvejis-Boltkrīvejis škārsuošonys atturāti 4663 cylvāki. Tymā pošā laikā pārņ vysa gods garumā nūvārsta 5286 ļaužu raudzeišona nalykumeigi škārsuot Latvejis-Boltkrīvejis rūbežu, kas nūzeimoj, ka nalegalūs migrantu plyusma pasalelinoj.
Vaļdeiba 2021. gods 10. augustā lēme izsludynuot uorkuortejū situaceju Ludzys i Kruoslovys nūvodūs, kai ari Daugovpilī. Tei vairuok reižu pagarynuota, i pādejais pagarynuojums nūsaceits da 10. augusta. Īšklītu minstreja vysu laiku nūruoda – Krīvejis aizsuoktais i Boltkrīvejis atkluoti atbaļsteitais kars pret Ukrainu ir viertejams kluotyn kai riska apstuoklis i īspiejama motivaceja Boltkrīvejai turpynuot raudzeišonu destabilizēt situaceju iz vaļsts rūbeža. Deļtuo itūreiz raidejumā izvaicuosim Īšklītu ministrejis vaļsts sekretaru Dimitriju Trofimovu i Vaļsts rūbežsardzis prīšknīka vītinīku, generali Ivaru Ruskuli, kab saprastu, kaida tod niu ir situaceja iz austrumu rūbeža, kaids itūšaļt teik izdareits spīdīņs iz tū, kai teik vārtāta niulinejuo nalegalūs migrantu plyusma, īspieja tū apturēt, i kaidi niu ir instrumenti, kab kuorteibu i drūšeibu iz rūbeža nūdrūsynuotu i atteisteitu. Taipat runojam par rūbeža sātmaļa stateišonu, deļkuo sābrim tys saīt dreižuok, kai ari par grūzejumim vaļsts rūbeža lykumā – Latvejis austrumu pīrūbežā uorkuortejuos situacejis vītā vaļdeiba dreikstēs nūsaceit eipašu režimu, kū tys nūzeimēs i kū dūs?