Daudzuos pošvaļdeibuos piec teritorialuos reformys teik palelynuoti bārnu pīdzymšonys pabolsti voi teik puormeiti tūs izmoksuošonys nūsacejumi.
Pīeja itūs pabolstu daškieršonai kotrā pošvaļdeibā sova — vīnā pabolstu izmoksoj naatkareigi nu tuo, voi jaundzymušuo vacuoki pyrma tuo ir bejuši deklarāti konkretajā pošvaļdeibā, a cytā — deklaracejis faktam juobyut nūstyprynuotam vysmoz godu pyrma. Ir vītejuos varys, kas vīnreizejū pabolstu sadalejušys i izmoksoj garuokā periodā. Itūreiz raidejumā apsavērsim Latgolys pošvaļdeibu pīredzi, sprīssim, voi bārnu pīdzymšonys pabolsti ir vīnleidzeigi voi vys tik diskriminejūši i pabolstu turismu veicynojūši, kai nūteik vaļsts i pošvaļdeibu funkceju puorsakluošona, kai ari tū, kaids itaidim pabolstim ir davums i kaidi riski?
Raidejuma virtualajā studejā gastej Rēzeknis vaļstspiļsātys socialuos puorvaļdis vadeituojs Gunārs Arbidāns, Rēzeknis nūvoda socialūs vaicuojumu komitejis vadeituoja Inta Brence (īvālāta nu "Jaunā Vienotība", Kustība "PAR" i Latgales partija saroksta), treis bārnu mama Ingūna Semule nu Rēzeknis nūvoda i Latvejis Pošvaļdeibu savīneibys vacuokais padūmnīks Māris Pūķis.