Nu Krīvejis aizsuoktuo kara Ukrainā da ituos šaļts Latvejā registrāts aptyvai 32 000 Ukrainys dzeivuotuoju, nu gondreiž 26 000 biegļu izsnāgti uzaturiešonys dokumenti ar tīseibom struoduot. Taipat Saeima 9. junī konceptuali atbaļsteja Ukrainys civilūs dzeivuotuoju atbolsta lykuma pameišonu, kas ļaun atbolsta dūšonu Ukrainys bieglim pagarynuot da goda gola.

Kai situaceju biegļu dzeivisvītys dūšonys i dažaidu cytu atbolsta fornu nūdrūsynuošonys vaicuojumūs itūšaļt Latvejis austrumu pošvaļdeibuos niu radz tī, kas eistyn dūd atbolstu nu Ukrainys īceļojūšajim patvāruma maklātuojim, skaidroj Ludzys nūvoda biegļu koordinators Jānis Romancāns, breivpruoteigais nu Olyuksna nūvoda Jonas Luskjavičs, Kruoslovys nūvoda pošvaļdeibys puorstuovs Žanis Škagals i Rēzeknis nūvoda turisma uzjiemieja, gostu sātys “Rāznas Ezerkrasti” vadeituoja Sandra Viša.

"Ar dorbu ir tai, kuri ceņteigi meklēja, jī mums ir atroduši. Mums ir saimis, kur jau kotrā pa diveji treis cylvāki struodoj. Gryuts, nav vīnkuorši, bet ir — kas ir kūkzuodžātovuos, pi myusu ir meitine, kas struodoj Ludzā benzintankā. Es vaira radzu leluoku problemu tamā dzeivuošonā iz prīšku,” dzeivisvītu vaicuojumu raidejumā aktualizej Jānis Romancāns.

"Ir ari vīna saime, kas soka — veirs iz dorbu, meita iz dorbu, es kasdīnā nadoru nikuo cyta kai viņ mekleju, kur mums varātu byut tei dzeivuošona piečuok, kur tys dzeivūklis, kū mes varēsim īrēt.”