Pārnejuo gods decembrī jau vīnpadsmytū reizi Nūdarbynuoteibys vaļsts agentura gūdynuoja breivpruoteigūs i breivpruoteiguo dorba organizatorus. Storp 71 apbolvojumam pīsaceitūs breivpruoteigūs i breivpruoteiguo dorba organizatoru nu vysys Latvejis, par pārnejuo gods lobuokū breivpruoteigū atzeita Rēzeknis nūvoda dzeivuotuoja, lūznavīte Ligita Stikute.

Nu 2016. gods Ligita dorbojās Lūznovys muižā, i, nasaverūt iz kusteibu trauciejumim, ar kū jei sadzeivoj piec dabuotuos traumys, jei aktivi īsasaista Lūznovys pogosta kūpīnys aktivitatēs i īkļaujūšu projektu eistynuošonā vītējā i storptautyskā leiminī. Ligita Lūznovys muižā dorbojās vairuokūs NVA nūdarbynuoteibys programys projektūs i breivpruoteigi turpynuojuse veikt sovus aizdavumus storpperiodūs, kod vīns projekts beidzās i ūtrys vēļ nav suocīs.

“Es ari sovā veidā dabojuu pīpiļdejumu ar tū, ka asu nūdereiga, ka es varu paleidzēt.”

Nu likteneiguos traumys, kod Ligitai vajadzēja pīrast pi rateņkrāsla i staiguošonys palīgīreiču, ir paguojuši 20 godi. “Piec traumys es godu nastaiguoju, vyspuor, saprūtams, tys pats suokums beja gryuts, taišni varbyut ari izīt uorā, pasaruodeit, seviški ari sovā pogostā, kur mani vysi zyna, tū es tai cīši spylgtai atguodoju.”

Vīns nu izaicynuojumu, kam beja juotiek puori piec traumys, “maņ beja juomuok papraseit paleidzeibys.” Tok leidzcylvāki ir paleidzeigi i atbolstūši. I niu jau ostoņus godus Ligitys kasdīna paīt Lūznovys muižā, sagaidūt apmaklātuojus, dorbojūtīs turysma centrā i paleidzūt vysaidūs ituo kulturys objekta dorbūs, projektūs i pasuokumūs.

“Suokumā nadaudz bīdēja tys faktors, ka asu rateņkrāslā i niu īs cylvāki, i kai mani uzjims…”, tok niu taišni Ligita veicynoj kai Lūznovys muižys darbinīku, tai apmaklātuoju izpratni par cylvāku ar kusteibu trauciejumim īsakļaušonu sabīdreibā, kai ari veicynoj kulturys montuojuma vītu daīmameibys vaicuojumu rysynuošonu kūpumā.

Ligita pīzeist, ka vidis pīlāguošonys jūmā Latvejā atteisteiba nūteik, vystik jei vaira aicynoj dūmuot par cylvāku ar kusteibu voi cytim īrūbežuojumim dorba īspiejom i dorba devieju atvierteibu i īinteresieteibu redzēt sovā dorbā taidus cylvākus. Juos pīmārs īdrūsynoj ari cytys personys ar kusteibu trauciejumim īsakļaut kulturys, kūpīnys, vītejū i storptautyskū projektu nūrisēs. Ligita ari pīsadalejuse Lūznovys muižys Erasmus+ laikmeteiguos dejis projektā i niu pīzeit, ka doncuot var kotrys.

“Juobyut pateiceigam, kas tev ir, i maņ dūts ir cīši daudz,” soka Ligita Stikute, Goda breivpruoteigais 2024.