Pyrma mieneša medejūs izskanēja informaceja par tū, ka Daugovpiļs regionaluo slimineica atsarūn bankrota prīškā i, ka naīsadūs dabuot kluotyn finansiejumu, tod jau rudiņ uorstnīceibys īstuode vaira navarēs snēgt pacientim sovus pakolpuojumus. Kab izavaireitu nu bankrota, Daugovpiļs regionaluo slimineica suokuse dūmuot par pacientu moksys paaugstynuošonu voi apsavīnuošonu ar kaidu cytu veseleibys pakolpuojumu snīdzieju, tai kai vaļdeibys daškiertais finansiejums veseleibys nūzarei nasadz īstuodis saimnīcyskūs izdavumus. Dyžan leluoku naudys pasalelinuošonu inflacejis apstuokļūs nasūlej ari tikū pījimtais vaļsts budžets.
Daugovpiļs regionaluo slimineica ir Latgolys regiona leluokuo slimineica, kur dīnā uzjem aptyvai 100 pacientu. Daugovpiļs slimineicys plānuotais budžets stacionarajim pakolpuojumim pārnejā godā beja 99 miļjoni eiro, bet vaļsts finansiejums – 26 miļjoni eiro, kas, nasaverūt iz inflaceju i vysu cytu, kas palīk duorguoks, nateik paaugstynuots. Daugovpiļs slimineica ir apriekinuojuse, ka, turpynojūt dorbu bez papyldu leidzekļu, ituo gods golā zaudiejumi varātu byut pi 10 miļjonu eiro.
Itūreiz ar Covid pandemejā par krizis laika kapteini sauktū Daugovpiļs regionaluos slimineicys vadeituoju Grigoriju Semjonovu saruna par ituos šaļts krizis puorvariešonu i varbyutejim rysynuojumim.