14. juņs – dīna, kod pyrma 80 godu vaira nikai 15 400 myusu vaļsts īdzeivuotuoju tyka deportāti nu Latvejis. Daļu nu jūs par reizi arestēja i nūsyuteja iz legerim, cytim lika dzeivuot Sibirī i Kazahstanā, kur jim beja smogi juostruodoj vītejūs kolhozūs i sovhozūs. Daudzi, vysvaira mozi bārni, nūmyra jau ceļā lūpu vagonūs voi nu slimeigu piec īsarasšonys izsyutejumu vītuos, cyti tyka nūsauti aizdūmuos par biegšonys paceli raudzeišonu.
1949. goda 25. martā iz Sibiri izsyuteja vēļ vaira nikai 42 tyukstūšys cylvāku. Daudzus nu 1941. godā represātūs bārnu, kuri 1946. godā atsagrīze Latvejā, 1949. godā izsyuteja ūtru reizi.
Latvejā nav gondreiž nivīnys dzimtys, kurā nabyutu represātūs. Daudzi dažaidu liktiņstuostu.
Atminis pagaist, izsyuteitī nūīt myužeibā. Itūreiz raidejumā kūpā ar “Sibira bārnu” i Rēzeknis politiski represātūs bīdreidys vadeituoju Regīnu Semjonovu, Daugovpiļs Universitatis Mutvuordu viesturis centra politiski represātūs dzeivisstuostu pietneicu Zani Melāni i Latvejis Nacionaluos bibliotekys puorstuovi i vīnu nu pasuokuma “Aizvestie. Neaizmirstie. 80 gadi kopš 1941. gada deportācijām” reikuotuoju Augustu Zilbertu runojam par tū, kai naaizmierst i pīminēt deportacejis.

 

Latgolys stuņdē kai īrosts ari aizvadeituos nedelis aktualitatis i gaidomī kulturys dzeivis nūtykumi.