Eiropa pīdzeivoj leluokū bāguļu krīzi suocūt nu Ūtruo pasauļa kara. Latvejā itūšaļt atsarūn vaira nakai 35 tyukstūšys ukraiņu bāguļu, daudzi nu jūs Latvejā īguojuši car leluokajim rūbeža škārsuošonys punktim iz Latvejis-Krīvejis rūbeža – Grebņovu i Terehovu. Ari itūšaļt tī ir vairuoki symti kotru dīnu. Škārsojūt rūbežu iz palikšonu Latvejā voi cauri braucūt iz kaidu nu tuoluoku Eiropys vaļstu, nu kara bāgūšuos ukraiņu saimis ir pīkusušys, izsaļkušys i nareši bez zīmai dereiga apgierba i dezorientāti jaunā vaļstī ar jim nasaprūtamu volūdu. Mes kotrys varim paleidzēt, zīdojūt naudu, kaidu vajadzeigū montu, taipat mes kotrys varim paleidzēt ari vīnkuorši ar padūmu, kaidu iztulkuotu nūruodi i breivpruoteigū dorbu. Par pīmāru, niu jau kaidu šaļti itai vīnkuorši ar sovu kluotyn byušonu i syltu čaju breivpruoteigi Grebņovys rūbežpunktā ībrauciejim nu Ukrainys paleidz bīdreiba „Tavi draugi”. Bet sabīdryskūs medeju labdareibys maratons „Dod pieci!” itūgod, puormejūt dzīsmi pret zīduojumu, aicynoj atbaļsteit Ukrainys bārnus, dūdūt jim vareibu pīdzeivuot Latvejā vēļ vīnu dīnu bez sirenu i spruodzīņu.
Šudiņ sarunā par tū, kai mes kotrys jau itūšaļt varim paleidzēt sovim leidzcylvākim, pīsadola bīdreibys „Tavi draugi” breivpruoteiguo nu Kuorsovys Inga Zagorska, Ludzys nūvoda pošvaļdeibys puorstuovs, ībraucieju nu Ukrainys vaicuojumu koordinators Jānis Romancāns i labdareibys organizacejis ziedot.lv vadeituoja Rūta Dimanta.