Sabīdryskais transports – autobusi, viļcīni – ir vīna nu vareibu kotram tikt nu sovys dzeivisvītys iz cytu vītu, cytu piļsātu, kab sajimtu pakolpuojumus, kab pagasteitu pi rodu i draugu, kab pabyutu kaidā kulturys nūtikšonā voi vīnkuorši tiktu da uorsta. Vys tik, ka cylvāks dzeivē ir sasaskuors ar funkcionalim traucejumim, ka jam ir ītekmāta redze, dzierde voi kusteibu breiveiba, itei vīnkuoršuo līta – īkuopt autobusā voi viļcīnī, tikt da pīturys, stacejis voi izbraukt iz perona – var byut lelys i ari naīveicamys gryuteibys. Vys vēļ vysā Latvejā sabīdryskais transports nav sakuortuots tai, kab tys bez papyldu paleidzeibys byutu izmontojams dažaidom socialom grupom. I nareši tikšona nu tuoļuoku lauku teritoreju iz Rēzekni, Bolvim voi Daugovpili, taipat ari nu Rēzeknis voi Daugovpiļs tikšona iz Reigu izaruoda vysā gryuts puorbaudejums voi pat naīspiejami, ka tev nav sova pīlāguota privatuo transportleidzekļa.

Par tū, kai itūšaļt vidis daīmameibu sabīdryskajā transportā viertej cylvāki ar funkcionalim traucejumim i kas jau teik dareits, kab itū daīmameibu uzlobuotu, itūreiz diskusejā ar invalidu i jūs draugu apvīneibys “Impulss” dybynuotuoju i apvīneibys “Apeirons” puorstuovi Latgolā Daini Pīrāgu, bīdreibys “Impulss” vadeituoju Valdi Laganovski, Ludzys invalidu bīdreibys vadeituoju Ilonu Seņkovu, Autotransporta direkcejis puorstuovi Zani Ploni i AS “Pasažieru vilciens” puorstuovi Egilu Krutovu.