Tikkū kai Parīzē aizvadeitys Olimpiskuos spēlis, kur storp 29 Latvejis olimpīšim beja ari vīglatlēte Gunta Vaičule. Koč i olimpiskajuos spēlēs 400 metru skriejīnī Gunta nasasnīdze pusfinalu, juos uzruodeitais rezultats ir ūtrais lobuokais sportistis karjerā, kas ļuove jai sovā disciplinā olimpiadē īsarynduot 26. vītā.
„Pyrmuos dīnys, atsagrīžūt sātā, mes taidā sovā vidī saucam pat par piecolimpiskū sindromu, varātu pat saceit – piecolimpiskū depreseju,” piec vaira nakai diveju nedeļu byušonys Parīzis Olimpiskajuos spēlēs, soka poša vīglatlēte Gunta Vaičule. Jai itei ir jau ūtruo olimpiskū spieļu pīredze. Pyrmuo beja pyrma ostonim godim Riodežaneiro.

„Tei ir grandioza atškireiba saleidzynojūt itū olimpiadi i, par pīmāru, olimpiadi Riodežaineiro”. Koč i Latvejis sportisti itūreiz palyka bez medaļu, jau byut storp 29 olimpīšim ir īvārojams sasnīgums. „Tys ir ari myusu uzdavums i dorbs – stuosteit sabīdreibai par tū, kū tys nūzeimej. Par tū, ka, par pīmāru pajemūt munu disciplinu, munu sporta veidu, munu rezultatu, maņ, lai tyktu iz itom spēlem, beja juoskrīn pusūtru sekuņdi uotruok. Respektivi, normativi ir palykuši daudz augstuoki, kab caltu tū leimeni i ari kab samazynuotu daleibnīku skaitu. Logiski, juo mozuok daleibnīku, juo spieceiguoka ir tei konkureņce, i spieceiguoka konkureņce ir, kab tyktu tymā pulkā īškā.”
 

Par zīmā pīdzeivuotū motivacejis tryukumu, i kai tū izadeve dabuot atpakaļ, par pīdzeivuotū smogū autoavareju dīnā, kod uzstuodeja sovu personiskū rekordu i kvalificiejuos olimpiskajom spēlem, par īspieju nest Latvejis karūgu olimpiskūs spieļu nūslāguma ceremonejā, par sporta atteisteibu reģionā i Latvejā, saruna ar vīglatlēti Guntu Vaičuli.
„Es jiutu, ka jaunī īt, bet jī naīt vēļ kluotyn. Bet jaunī īt, i tei ir lobuo ziņa.” Voi nuokušajuos olimpiskajuos spēlēs jai byus kaids, kas sastuoda konkurenci, jai pasceit gryuši.

„Kab aizītu da cīši augstim sasnīgumim, ir juosasalīk cīši daudzim faktorim, tys nav par vīnu sportistu voi par talanteigim jaunīšim, tys nav par vīnu treneri, kas ir cīši motivāts, tys nav ari par sporta bazi, kura ir voi nav daīmama. Tam vysam ir juosasalīk koč kaidā ziņā kūpā.”