Latvejā oficiali 27. februars ir nūsaceita kai Storptautyskuo navaļstiskūs organizaceju dīna, tai vēļ itūnedeļ lēme Saeima, pījamūt izmainis lykumā „Par svātku, pīminis i atzeimojamajom dīnom”. Kai vareibu tai rūsynuot vaļsts īstuodis i pošvaļdeibys vaira sasadorbuot ar piļsūniskuos sabīdreibys organizacejom, kūpeigi diskutēt par aktualom temom i rast rysynuojumus vysaidim socialim, vidis i ekonomiskajim izaicynuojumim, tū saradz ari vīna nu aktivuokūs piļsūniskuos sabīdreibys organizaceju ūtrajā leluokajā Latvejis piļsātā Daugovpilī bīdreiba „Cita Daugavpils”, kas vēļ ituos nedelis suokumā, 24. februarī, Daugovpilī organizēja pasuokumu Ukrainys atbolstam – eipašu plakatu darbneicu i guojīni piļsātys centrā „Kopā līdz uzvarai!”.

Bīdreibys „Cita Daugavpils” vīna nu dybynuotuoju i niu ari vaļdis prīšksādātuoja Inga Belousa soka: „Itūs diveju, treis godu laikā, kod bīdreiba pastuov, mes asam tī, kas Daugovpilī latvīšu volūdā organizej sabīdreibu pīsadaleit, izkuopt nu sovu ārtūs dzeivisvītu, pīsaceļt nu sovu divanu, puorstuot stuosteit stuostus i muoceit cytus sovus leidzcylvākus dzeivuot, bet īt i dareit kūpā ar vysim. Sasatikt i kūpā puorstuovēt leluoku demokratisku spāku, kas ir cīši svareigi Daugovpilī. Deļ tam, ka mes atsarūnam aptyvai 40 km leidz Boltkrīvejis rūbežam, kur ir daudz atškireiguoka situaceja nakai myusu vaļstī i mes asam tyvai Krīvejai, i mums ruodīs, ka

itamā piļsātā ir juoorganizej daudz vairuok taidu pasuokumu, kur mes paruodam ari demokratiskū seju,”