Paguojušajā nedeļā Saeimys Cylvāktīseibu i sabīdryskūs lītu komisejis Latgolys apakškomisejis sēdē vēļreiz tyka aktualizāts vaicuojums par tū, kai plānuotajā školu reformā, samazynojūt školu skaitu, varātu izavērt vaļsts austrumu pīrūbeža regions, kas ir svareigi ari nu vaļstiskuos drūšeibys vaicuojuma, jo austrumu rūbežs ir ari uorejais ES i NATO rūbežs. Izgleiteibys ministrejis pīduovuojumā pīrūbeža školom pamatškolys pūsmā školānu skaita īrūbežuojuma nabyutu, tok vydsškolys pūsmā školānu skaita kriterejs ir paradzāts.

Sovpus 19 Latgolys navaļstiskuos organizacejis atbiļdeigajom ministrejom aktualiziejušys latgalīšu volūdys vuiceišonuos īspiejis regiona školuos, atkluotā viestulē pīprosūt tam pastuoveigu vaļsts finansiejumu. Par tū, kaidi jau itūšaļt teik pīduovuoti rysynuojumi, plotuok sarunā ar Izgleiteibys i zynuotnis ministrejis parlamentarū sekretari Silviju Reinbergu (Jaunuo Vīnuoteiba), Bolvu nūvoda dūmis deputatu, kai ari Zīmeļlatgolys latvīšu bīdreibys vaļdis lūcekli Aldi Bukšu (Konservativuo parteja), Latvīšu viesturiskūs zemu atteisteibys padūmis Latgolys viesturiskuos zemis sabīdreibys puorstuovi Daini Mjartānu i Baļtinovys vydsškolys direktoru i Bolvu nūvoda dūmis deputatu Imantu Slišānu (Latgolys parteja).