Saeimā konceptuali atbaļsteits lykumprojekts par padūmu i nacistyskuo režimu slavynūšūs objektu eksponiešonys aizlīgumu i tūs demontažu Latvejis Republikys teritorejā, kū pošvaļdeibom byus juopadora na vāluok kai da ituo goda 15. novembra. Ar jaunū lykumā paradzāts nūsaceit, ka publiskajā vidē teik aizlīgts eksponēt pīminekļus, muokslinīcyskūs veiduojumus i cytus objektus, kas slavynoj PSRS voi nacystyskuos Vuocejis okupacejis varu, ar tū saisteitu nūtikšonu voi personu, slavynoj totalitarisma ideologeju, vardarbeibu, militaru agreseju i kara ideologeju, kai ari tymūs ir padūmu varys voi nacisma simboli. Itys lykums naatsatīks ir pīminekļu, kas atsarūn karā krytušūs karaveiru apbedejumu vītuos, kai ari padūmu ci nacistyskuo terora uperu pīminis vītuos.
Kūpumā Latvejā ir ap 300 pīminekļu, pīminis plākšņu i memorialūs objektu, kas veļteiti padūmu okupacejis režimam i armejai. Par zeimeiguokajim i radzamuokajim itaida veida objektim Latgolā, kū ar tim byutu juodora – juodemontej, juopuorvītoj voi juopamat sovā vītā, kai ari viesturiskū atmiņu i tuos izpratni sarunā ar viesturnīku, Latvejis Universitatis Filozofejis i Sociologejis instituta pietnīku Kasparu Strodu, televizejis i radejis raidejumu veiduotuoju, muziki, ari viesturis doktorantu Arni Slobožaninu i Ūlainis Viesturis i muokslys muzeja direktoru, daugovpilīti Viktoru Andruškeviču.