Par tū, kai vakcinacejis aptverē eipaša viereiba byutu juoveļtej Latgolys regionam, runoj jau nu vakcinacejis suokuma, kod Latvejis austrumu regions suoce atpalikt sasapūtiešonys tempā nu cytu regionu. I šudiņ, kod kūpā vaļstī Covid-19 saslimsteibys leikne lieneišom, nu vys tik saryuk, vys vēļ sarežgeita situaceja ir Latgolā. Par pīmāru, Daugovpiļs ir vīneiguo piļsāta Latvejā, kur saslimšona ir pat iz pusi augšuoka nakai vaļstī videji. Latgolā vēļ arviņ ir ari mozuokais vakcinātūs skaits. Piec ekspertu dūmu, uzrunuot latgalīšus vakcinētīs byutu vajadzeigs vaira individuali, apdūmojama ari saimis uorstu i mediķu izgleituošona, kab jī lobuok spātu puorlīcynuot navakcinātūs. Nu ir uorsti, kurī atzynuši, ka taišni krīvvolūdeigajim zynuošonys par virusu i ari vakcinaceju ir zamuokys.

Deļkuo Latgolā ir zamuoka sasavakciniešonys aptvere i kai tū maineit, par tū runojam ar rakstneicu, žurnalisti, ari gidi, kurei itūšaļt struodoj Rēzeknis nūvoda pošvaļdeibā, Annu Rancāni, uorstu, Viļānu slimineicys vadeituoju Juri Galeriju Vidiņu, Daugovpiļs Marka Rotko muokslys centra vadeituoju Māri Čačku i komunikacejis zynuotņu doktoru, Latvejis Universitatis Filozofejis i sociologejis instituta pietnīku Mārtiņu Kaprānu, kuruo pietnīcyskūs interešu lūkā ir ari taidys temys kai krīvvolūdeigūs kūpīnys postpadūmu telpā, storptautyskūs ziņu plyusmys, viesturis politika i paguotnis komunikaceja.