Tyvojās pošvaļdeibu vieliešonys, deļtuo rubrikā „Kas nūteik munā sātā?” runuosim ar aktivim cylvākim par Latgolys nūvodu i obu vaļstspiļsātu pošvaļdeibuos izdareitū, kai ari par atteisteibu tuoļuok. Kas cylvākim ir svareigi, izviertejūt aizguojušūs četrus godus, i kaidi ir golvonī aspekti, kab izavālātu, par kū bolsuot sovā nūvodā ituo gods pošvaļdeibu vieliešonuos, kas byus 7. junī.

Itūreiz suocam ar Bolvu nūvodu. Kas nu parteju sūlejumu padareits, kas palics pusceļā – školu optimiziešona, atbolsts saimem i uzjiemiejim, ceļu remonti i pakolpuojumu nūdrūsynuojums nūvodā. Sarunā pīsadola Bolvu nūvoda uzjiemieja nu Škilbānu pogosta, kura puorstuov uzjāmumu „Stabļovas ķiploks” Ilze Supe, navaļstiskuo sektora i kulturys puorstuovs – Namaterialuos kulturys montuojuma centra „Upīte” vadeituojs Andris Slišāns, kūka apstruodis uzjiemiejs nu Ruguoju Kārlis Brūveris, uzjāmuma SIA „BTRS” eipašnīks Raimonds Trubņiks.