Tyvojās pošvaļdeibu vieliešonys, deļtuo rubrikā „Kas nūteik munā sātā?” runuosim ar aktivim cylvākim par Latgolys nūvodu i obu vaļstspiļsātu pošvaļdeibuos izdareitū, kai ari par atteisteibu tuoļuok. Kas cylvākim ir svareigi, izviertejūt aizguojušūs četrus godus, i kaidi ir golvonī aspekti, kab izavālātu, par kū bolsuot sovā nūvodā ituo gods pošvaļdeibu vieliešonuos, kas byus 7. junī.

Itūreiz par Rēzeknis nūvodu, kas izdareits i cik aktivi ir bejuši pošvaļdeibys deputati, kaida ir bejuse sadarbeiba i komunikaceja ar nūvoda cylvākim. Pyrma četru godu Rēzeknis nūvodā īsakļuove bejušais Viļānu nūvods, kaida tam bejuse ītekme. Drūšeibys situaceja, investiceju pīsaiste, birokrateja, i kaidys puormainis ir voi nav gaidomys Rēzeknis nūvodā.

Sarunā pīsadola vīna nu leluokūs uzjāmumu i dorba devieju Rēzeknis nūvodā AS „Latvijas Finieris” padūmis lūceklis i „Verems” padūmis prīšksādātuojs Jānis Staris, Leņdžu pogosta īdzeivuotuoju konsultativuos padūmis puorstuove, kura dorbojās sovā saimis uzjāmumā Ineta Silabriede, rodūšais marketinga specialists, kurs ar zeimynu „Latgalactica” dorbojās Rēzeknis nūvodā Raimonds Platacis i Dekšuoru tautys noma kulturys dorba organizators Sandis Mesters.