Rēzeknis nūvodā ir 28 pogosti i Viļānu piļsāta. Ite kūpumā dzeivoj tyvu 30 tyukstūšu cylvāku, tok kai pošvaļdeibu, tai i Saeimys vieliešonuos bolsuotuoju aktivitate ir vīna nu zamuokūs vaļstī – videji tikai 37–38% cylvāku, kas var dasadalēt vieliešonuos, sovu bolsu ari izmontoj. Lels izaicynojums Rēzeknis nūvodam ir ari Rēzeknis vaļstspilsāta, kas atsarūn nūvoda centrā, ite īsakuortuojs ari nūvoda administrativais centrs. Ari lykumā jau īraksteits, ka 2029. godā obejom itom pošvaļdeibom juoapsavīnoj.
Kai tys varātu ītekmēt nūvoda atteisteibu, cik tod patīseibā ir aktivi poši Rēzeknis nūvoda dzeivuotuoji, i kaida ir pogostu sadarbeiba, kas ir voi nav mainejīs piec Viļānu pīvīnuošonys Rēzeknis nūvodam, kaids ir i voi pīteikami izmontuots nūvoda potencials uzjiemiejdarbeibā i tūrismā.
Turpynojūt rubriku „Kas nūteik munā sātā?” itūreiz raidejumā par Rēzeknis nūvoda atteisteibu i izaicynuojumim kūpumā runojam ar Rēzeknis nūvoda pošvaļdeibys vadeituoju Monvīdu Švarcu (īvālāts nu "Jaunuo Vīnuoteiba", Kusteiba "PAR", Latgolys parteja), Dekšuoru pogosta konsultativuos padūmis prīšksādatuoju Jolantu Smani, Lūcejis Rancanis Makašānu Omotu vydškolys direktori Gundegu Rancāni, uzjiemieju, marketinga specialistu “Latgalactica” idejis virzeituoju Raimondu Plataci i SIA "BAIBIŅA" RSEZ izpilddirektori Baibu Katkovsku.