Tyvojās pošvaļdeibu vieliešonys i rubrikā „Kas nūteik munā sātā?” itamā reizē par pādējūs godu laikā daudz aprunuotū Rēzeknis vaļstspiļsātu.

Raidejumā dzierdēsim, kai vysu 10 itymā godā pošvaļdeibu vieliešonom Rēzeknē dasaceitūs politiskūs sarokstu liderus, tai ari aktivus riezeknīšus – uzjiemieju, navalstiskū organizaceju i jaunatnis puorstuovi, kū asam aicynuojuši studejā kab analizātu pādējuo sasaukuma padareitū, piļsātys atteisteibu kūpumā, i kas jim ir svarīgi, īmūt itymā godā vēlēt.

Pādejūs diveju godu laikā vaļdeibys, Saeimys i ari medeju dīnys kuorteibā Rēzeknis vaļstpiļsāta daudz aprunuota naudys problemu i ari jaunizcaltuo rekreacejis centra jeb SPA sakarā.
Vaira nakai pyrma pusūtra goda par puorkuopumim, tymā storpā finaņšu i budžeta vaicuojumu rysynuošonā, atstuodynuots piļsātys mers, nu „Saskanis” īvālātais, vāluok jaunu parteju „Kopā Latvijai” sataisejušais Aleksandrs Bartaševičs, kam sekuoja jauna mera īvieliešona. Piļsātys vadeibu iz šaļti beja uzajiems Aleksejs Stecs, ari nu īprīšk mynātuo politiskuo spāka, bet atbiļdeiguo par pošvaļdeibom ministreja par nespieju aiz laika sagatavuot piļsātys budžetu, dūmis deputatus atlaide, i niu jau napylnu godu piļsātu voda vaļdeibys īcalta pagaidu administraceja. Ari Vaļsts kontrole nūruodejuse iz byutiskom problemom Rēzeknis puorvaļdeibā, i pret atstuodynuotū meru Aleksandru Bartaševiču īrūsynuota kriminallīta par nakustamū eipašumu ūorvaļstīs nadeklariešonu i īrūbežuotys daīmameibys informacejis nūdūšonu nasaisteitim cylvākim.

Sarunā pīsadola: uzjāmuma „IRBIS Technology” vadeituojs, Rēzeknis specialuos ekonomiskuos zonys Uzjiemiejdarbeibys komisejis lūceklis i Latvejis Tierdznīceibys i ryupnīceibys kamerys regionaluos padūmis puorstuovs Aivars Tjarve, Latgalīšu kulturys bīdreibys vadeituoja Ilga Šuplinska, Rēzeknis vaļsts 1. gimnazejis školāns i Jaunīšu Saeimys puorstuovs Mārtiņš Mikažāns.