Tyvojās pošvaļdeibu vieliešonys, deļtuo rubrikā „Kas nūteik munā sātā?” runuosim ar aktivim cylvākim par Latgolys nūvodu pošvaļdeibuos izdareitū, kai ari par atteisteibu tuoļuok. Kas cylvākim ir svareigi, izviertejūt aizguojušūs četrus godus, i kaidi ir golvonī aspekti, kab izavālātu, par kū bolsuot sovā nūvodā ituo gods pošvaļdeibu vieliešonuos, kas byus 7. junī.
Itūreiz par Augšdaugovys nūvodu – kas izdareits i cik aktivi ir bejuši pošvaļdeibys deputati, kaida ir bejuse sadarbeiba i komunikaceja ar nūvoda cylvākim. Pyrma četru godu bejušais Ilūkstis nūvods tyka apvīnuots ar Daugovpiļs nūvodu, rodūt kūpā jaunu Augšdaugovys nūvodu, kura centrs ir Daugovpiļs piļsātā, bet poša piļsāta gon nav nūvodā.

Pošvaļdeibu vieliešonuos pyrma 4 godim ite nūbolsuoja cīši moz cylvāku – viņ 28% nu bolsstīseigajim voi 6000 apvīnuotuo nūvoda cylvāku.
Taitod viņ 6000 cylvāku beja nūscejuši ituo vysai leluo nūvoda liktini iz četrim godim, dūmē īvālūt deputatus nu 4 partejom. Vysvaira – 7 vītys – dabuoja „Daugovpiļs nūvoda parteja”, kotra pa 3 vītom dabuoja „Latvejis zemnīku savīneiba” i Latgolys parteja, 2 vītys atstuojūt ari „Saskaņai”.
Sarunā par tū, kas pa itim pādejim godim izdareits Augšdaugovys nūvodā, pīsadola zemnīku saimnīceibys „Liepukalns” saiminīks nu Kolupa pogosta Pēteris Skrinda, aktivs Ambeļu īdzeivuotuojs Jānis Ozoliņš, kurs sovulaik īsastuojs par kūku nacieršonu sovā cīmā, saimis uorsts, kirurgs Aleksejs Jefremkins, kurs dzeivoj Naujenis pogostā, i turisma uzjiemieja Salīnys pogostā, Lielbornis muižys eipašneice Nora Poiša.