Tikū sagaidejom Jaunū godu, kū itūgod aizānuoja kars Ukrainā. Ituo īmesļa deļ daudzys pošvaļdeibys nu kasgadejuos godu puorsameišonys ar svātku uguņuošonu beja atsasacejušys vyspuor, tai, naviņ itamā duorzeibys situacejā taupūt leidzekļus, nu ari solidarizejūt ar ukraiņu ībrauciejim myusu vaļstī, kurus psihologiski ītekmej sevkurs spruodzīņa trūksnis. Vys tik tys nalīdz Jaunū godu ar pirotehniku atzeimuot pošim sovūs pogolmūs. I itūgod varbyut drupeit cytaiž ari uztvērem tū, ka vys vēļ daudzi Latvejis dzeivuotuoji meilupruot guņs dabasūs saun na pušnaktī, a stuņdi dreižuok piec Krīvejis aba Moskovys laika.

Par kūpeibu naviņ Jaunuo gods naktī, bet ari puorejā laikā, par sabīdreibys nūskaņuojumu, populismu i “vyss ir švaki” sauklim, socialuo teikla “Tik Tok” viestejumim i tū, kū varim i vajadzātu dareit, kab sabīdreibu padareitu cīšuoku i vīnuotuoku, veicynuotu lojalitati i pīdareibu vaļstei, itūreiz runojam ar žurnalistim i pietnīkim. Sarunā pīsadola Austrumeiropys politikys pietejumu centra pietnīks Mārcis Baluodis, Baļtejis pietnīcyskuos žurnalistikys centra “Re:Baltica” vadeituoja i žurnaliste Inga Spriņge i Ingemārs Vekteris, Medeju pietnīceibys i atteisteibys centra izveiduotuojs, vēļ napaseņ ari TV kanala ReTV vadeituojs.