Vaļsts kontrole pārnejuo gods golā revidēja Rēzeknis vaļstspiļsātys budžetu i finaņsis, pyrma Zīmyssvātku paziņojūt, ka Rēzeknis aizvadeituo gods budžetā dalaisti vairuoki nūpītni puorkuopumi. Rezultatā Vaļsts kontrole davuse nagativu viertejumu, nūruodūt – piļsātys 2023. gods budžetā nav bejuši īplanavuoti vysmoz 8,68 miļjoni eiro treis mienešu izdavumu segšonai, gruomatvedeibys puorskotā nav bejušys paruodeitys īspiejamuos pošvaļdeibys saisteibys gondreiž 13,7 miļjonu eiro lelumā, piļsātai nav leiguma ar zvārynuotu revidentu, kas dasavārtu 2023. gods puorskotu, kai i pārnejuos zīmys syltuma tarifi nav bejuši aiz laika puorsavārti i samazynuoti, taidā veidā vaļsts izmoksuoja SIA “Rēzeknes siltumtīkli” vysmoz par 4,55 miļjoni eiro vaira, nakai tys byutu bejs piec tarifu puorsavieršonys.

„Revidenti nedeļu struoduoja Rēzeknē, verūtīs tū informaceju, kurei nabeja atrūnama gruomatvedeibu registrūs,” raidejumā revizejis gaitu i sacynuojumus skaidroj Vaļsts kontrolers Edgars Korčagins. „Nasaceišu, ka ļauds nabeja atvārti i nagrybātu sasadorbuot. Beja vysaidi cylvāki i dūmis specialisti, kas ar prīcu sasastruoduoja i deve mums vysu vajadzeigū informaceju, atdareja vysys mapis, tok juosoka, ka zynoma naskaidreiba volda pošā Rēzeknis vaļstspiļsātys dūmē i tuos īstuodēs.

Kam Rēzeknē gruomatvedeiba ir sadaleita pa deveņom vysaidom īstuodem, kas pošim dūmis darbinīkim ari padora gryušuoku informacejis dabuošonu.”

Centralizēt gruomatvedeibu ari ir vīns nu Vaļsts kontrolis īsacejumu piec revizejis, tai kai itūšaļt dabuot vīnuotu, puorsaveramu i saleidzynojamu informaceju nu Rēzeknis ir gryuts. „Sevkurā situacejā, kod volda naskaidreiba, kod nav skaidreibys, kas kuram ir juodora, kaids ir kura aizdavums, kai nūteik vysaidi procesi, taiduos situacejuos vysod daudzi ārtuok i vīgļuok koč kū ir nūglobuot, ka kaidam tai gribīs.”

Finaņšu vaicuojumus atbiļstūši lykumam kotrā pošvaļdeibā puorsaver daaicynuots zvārynuots revidents, kurs kotru godu verās pošvaļdeibys goda puorskotu i snādz atzynumu par tū.

„Mums ruodīs, ka vysmoz miļjonūs naparuodeitys saisteibys goda puorskotā zvārynuotam revidentam piļneigi nūteikti beja juoradz.

Vaļsts kontrole piec revizejis pabeigšonys grīzsīs pi Latvejis Zvārynuotūs revidentu asociacejis, kurys kompeteņcē ir taiseit kvalitatis puorbaudi par zvārynuota revidenta dorbu,” tur Edgars Korčagins, nūruodeidams, ka taipat informaceja par atkluotū Rēzeknē tuoļuok nūdūta kai Vaļsts policejai, tai KNAB.