Leidza ar lelū Covid-19 saslymušūs skaita dreizū kuopumu 7. oktobrī vysā vaļstī izsludynuota uorkuortys situaceja medicinā, kas nūzeimej maksimalu slimineicu resursu puororganiziešonu i planveida stacionaruos paleidzeibys īrūbežuošonu, kab varātu nūdrūsynuot naatlīkamū mediciniskū paleidzeibu, paleidzeibu akutūs gadīņūs i Covid-19 pacientu uorstiešonu. Nu 11. oktobra ari vaļstī pasludynuota uorkuortejuo situaceja. Itaidu tīsyskū režimu izlamts aizvest iz treju mienešu da 11. janvara.
Pīaugūt stacionātūs Covid-19 pacientu skaitam, pasalelinoj ari slimineicu nūslūdze, deļkuo itūšaļt nateik izslāgts, ka pacientu skaits varātu ari sasnēgt taidu apmāru, kod byus juosuoc dareit pacientu škiruošona stacionarūs.
Kai ar krizi medicinā teik golā Latgolys regiona medicinys pakolpuojumu snīdzieji, itūreiz sarunā skaidruosim ar Daugovpiļs Regionaluos slimineicys vadeituoju Grigoriju Semjonovu, Latvejis lauku saimu uorstu asociacejis vadeituoju, saimis uorsti Bolvūs i Bolvu nūvodā Līgu Kozlovsku, SIA “Ludzas medicīnas centrs” vadeituoju Juri Atstupenu i Naatlīkamuos mediciniskuos paleidzeibys dīnasta Latgolys regionaluo centra vadeituoja vītineicu Astrīdu Igolnieci.