Izmainis Augstškolu lykumā, kurys pārnejuo goda junī apstyprynuoja Saeima, nasušys puormainis augstškolu puorvaļdeibā, sataisūt augstškolu padūmis. Ituos padūmis ir kolegialys augstuokuos liemiejinstitucejis, kas atbiļdeigys par konkretuos augstškolys ilgtspiejeigu atteisteibu, strategiskū i finanšu uzraudzeibu. Padūmei juonūdrūsynoj ari vaļsts augstškolys darbeiba atbylstūši tuos atteisteibys strategejā nūsaceitajim mierkim. Ari obejom Latgolys regiona augstuokuos izgleiteibys īstuodem niu sataiseitys padūmis.

Ar Latgolys augstškolu padūmu puorstuovim – uzjiemieju, biznesa eņgeli Voldemāru Brēdiki i itūšaļt ari Rēzeknis Tehnologeju akademejis padūmis lūcekli i Māri Bozoviču, Latgolys regiona atteisteibys agenturys direktoru i niu ari Daugovpiļs Universitatis padūmis lūcekli – puorrunojam augstuokū izgleiteibys īstuožu padūmu lūmu, tyvuokus i tuoluokus mierķus, kaidys īspiejis jaunī padūmu lūcekli saradz regionalūs augstškolu konkurētspiejis veicynuošonā Latvejis i storptautyskajā tiergā, kaidys varātu byut augstškolu atteisteibys tendencis, kai ari finansiejuma pīsaistis īspiejis.

“Regionalom augstškolom ir sovi izaicynuojumi kai regionalā, tai nacionalā kontekstā, jo juosajādz, ka

regionalai augstškolai ir ari vairuokys funkcejis paraleli tik izgleiteibys funkcejai, i tai ir ari sociali ekonomiskuo funkceja taišni regiona i piļsātys, kurā tei atsarūn, izpratnē i nūzeimē.

Taitod, kab ari kū mes plānuotu i taiseitu, mes nadreikstam aizmierst itū faktoru, i tys ir juojem vārā,” atzeist Voldemārs Brēdikis.

“Daugovpiļs Universitatis sakarā tys ir leidzeigi kai tys ruodīs ir ari Rēzeknis Tehnologeju akademejai – tys ir studentu skaits, studentu pīsaiste, tei ir vuiceibspāku kvalifikaceja, nūstyprynuošona i ari ceļšona. I itūšaļt ari nu cīši izteikti byus vaicuojumi saisteibā ar augstškolys darbeibys nūdrūsynuošonu, verūtīs iz itū energoresursu cenu pīaugumu i kūpejū cenu pīaugumu ekonomikā,” izaicynuojumus padūmis dorbā puorskaita Māris Bozovičs.