Ka bārnim ir apsūleiti svātki Mežaparkā voi Daugovys stadionā, ar dejom i dzīsmem vītejā estradē nabyus gona. Tai Dzīšmu i deju svātkus i tūs īspiejamuos nūrisis scenarejus pandemejis īrūbežuojumu laikā viertej raidejumā uzaicynuotī – horeografs Ilmārs Dreļs, Dīnvydlatgolys nūvoda bārnu i jaunīšu folklorys kūpu koordinatore Anna Kārkle, kai ari koru i vokaluo ansambļa „Varbyut” vadeituoja Bolvu nūvodā Linda Vītola.
Školu jaunuotnis dzīšmu i deju svātku atcelšona ūtrū godu piec kuortys varātu ilgtermeņā atsaspēlēt cīši suopeigai – tai pyrma puora dīnu, skaidrojūt īspiejamūs svātku nūrisis scenarejus, izsvēre kulturys ministrys, Dzīšmu i deju svātku padūmis prīšksādātuojs Nauris Puntulis (NA).  
Koč ari XII Latvejis Školu jaunuotnis dzīšmu i deju svātkim izstruoduoti treis tūs nūtikšonys scenareji i daudz kas vēļ ņimoz nav zynoms, vītejī koordinatori suokuši gatavētīs vysmaz dalieji tūs atzeimuot regionali. Anna Kārkle atkluoj, ka folklorys kūpom Latgolā planavuots sasatikt julī Rībeņu pusē. Cikom lobuokī Latvejis doncuotuoji i koristi cerej puļcētīs Reigā i atjaunuotajā Mežaparka estradē.
Pandemejis laikā „golus daīt saviļkt” ari kulturys darbinīkim. Raidejuma gosti stuosta, ka pošdarbnīku kolektivi nareši cīš nu tuo, ka napīteik naudys nūpierkt tārpus. Sovpus kolektivu vadeituojim, kab nūpeļneitu, juostruodoj vairuokūs dorbūs. Par speiti vysam aktivuokī mieginuojumus rauga puorceļt ari iz virtualū vidi. Viertejūt prīšklykumu dorbuotīs i vareibu mieginuot svaigā gaisā, kolektivu vadeituoji gon ir vysā skeptiski. Koristim taidā gadīnī juonūdrūsynoj aizviejs, cikom doncuotuoji īvāruot diveju metru distaņci navar vyspuor.

Latgolys stuņdē kai īrosts ari aizvadeituos nedelis aktualitatis i gaidomī kulturys dzeivis nūtykumi.