Jau pyrmūdiņ, 5. februarī, 16 Latvejis piļsātuos lauksaiminīki organizej protestus, kurūs tiks izmontuota ari lauksaimisteibys tehnika, tys nūzeimoj, ka dzeivuotuojim juosariekinoj ar īspiejamim satiksmis īrūbežuojumim. Latgolā protesti byus kai Rēzeknē, tai Daugovpilī, ari Jākubpilī.

Lauksaiminīku izvierzeituos praseibys:

  • Krīvejis i Boltkrīvejis puortykys produktu importa aizlīgums par reizi bez puorejis perioda;
  • 5 % samazynuotuos PVN likmis atjaunošona Latvejai rakstureigajim auglim, ūgom i duorzuojim; nūzaris konkurētspiejis veicynuošona;
  • birokratejis mazynuošona lauksaimisteibys nūzarē;
  • plašuoka pīīšona apdrūšynuošonys i apgrūzomūs leidzekļu programom,
  • atsasaceišona nu nacionala leimiņa zemis apgryutynuojumim voi cytim zemis lītuošonys īrūbežuojumim.

Praseibys īsnāgtys  Ministru prezideņtei i zemkūpeibys ministram, i lauksaiminīki gaida realus rysynuojumus.
Cik praseibys ir realys, i cik aktivai Latgolys zemnīki planavoj īsasaisteit akcejā, par tū plotuok sarunā ar bīdreibys “Zemnīku Saeima" vaļdis lūcekli i vīnu nu golvonūs protesta organizātuoju Mārtiņu Tronu, Latgolys ražojūšūs lauksaiminīku apvīneibys vadeituoju i ZS “Zelmeņi” eipašnīku Aivaru Bernānu, ZS “Meža Grumuži” eipašnīku Arturu Tjušu, kai ari Zemkūpeibys ministrejis Vaļsts sekretaru Raivi Kronbergu.