Dokumentalū kinu “Daugavpils – iespēju vai nespēju pilsēta?”, kū pyrma diveju nedeļu plotuokai publikai pīduovuoja jaunuo digitaluo marketinga laukā struodojūšuo specialiste Vladislava Romanova, socialajā teiklā youtube jau nūsavārušys vaira nakai 30 tyukstūšys ļaužu. Kai zam kinys, tai cytūs socialajūs teiklūs kinu komentiejuši daudzi cylvāku, i komentarus par tū var skaiteit vairuokūs symtūs. Koč ari leluokuo daļa atsauksmu ir styprynojūšys i iz diskuseju aicynojūšys, daļā vys tik var redzēt naida runu i draudus. Bet pats dorbs runoj par daugovpilīšim, par atsatīkšonu pret karu, par latvyskū i krīviskū redzīņu sadursmi. Šudiņ raidejumā par kinu, latvyskū i krīviskū ūtrajā leluokajā Latvejis piļsātā, kai ari par tū, kai Latgola i Daugovpiļs sevi pozicionej marketinga tiergā, izvaicuosim kinys autori, digitaluo satura marketinga agenturys “New Black” rodūšū direktori, Daugovpilī dzymušū Vladislavu Romanovu.