Aizvadeitajā pīktdīnē Rēzeknē, Latgolys viestnīceibā GORS, vaļsts prezidents Egils Levits aicynuoja latgalīšus i Latgolys īdzeivuotuojus iz nūslādzūšu diskuseju par izstruoduotū i Saeimā īsnāgtū latvīšu viesturiskūs zemu lykumprojektu i Latgolys ideņtitatis kulturviesturiskū i myusdīneigū.
Diskusejā par lykumprojektu, kuru Saeima catūrtdiņ nūdeve izskateišonai komisejuos i kura mierkis ir styprynuot īdzeivuotuoju ideņtitati i pīdareibu vītejom kūpīnom i latvīšu viesturiskajom zemem, pīsadaleja dzejneica Anna Rancāne, Latgolys pūdnīku dzymtys tradiceju turpynuotuojs, pūdnīks Andris Ušpelis, Namaterialo kulturys montuojuma centra „Upīte” vadeituojs Andris Slišāns, Dagdys nūvoda Ezernīku pogosta Saītu noma vadeituojs, bīdreibys „Dagne” vadeituojs Aivars Bačkurs, radejis raidejumu vadeituojs, postfolkloras grupys „Rikši” muzikis Ēriks Zeps, kai ari daudzi cyti interesenti i lels skaits vydškolānu.
Kai, izsuokūt diskuseju, atzyna Egils Levits, Saeimā īsnāgtais Latvīšu viesturiskūs zemu lykums byus sasnēdzs sovu mierki, ja cytom paaudzem ideņtitatis daudzveideiba byus daīmama vysmoz taidā pošā apmārā, kai tys itymā breidī i mums. Taipat vaļsts prezidents tur, ka Latgolys ideņtitate nu vysu viesturiskūs zemu ir vysaspylgtuokuo, i tei primari izapauž latgalīšu volūtā.
Raidejumā par Saeimā īsnāgtū lykumprojektu izvaicovom pošu vaļsts prezidentu Egilu Levitu, apkūpuojom ari aspektus i suopeiguokūs vaicuojumus, kū prezidentam izdeve poši latgalīši, kai arī tū, cik byutiska jim ruodejuos itaida diskuseja.

Latgolys stuņdē kai īrosts ari aizvadeituos nedelis aktualitatis i gaidomī kulturys dzeivis nūtykumi.

Īsaklausi! Raidam latgaliski!