Laura Pliča-Stankeviča: lepojūs ar sovu meilū tviterkonvoja armeju

Patriotu nedelis nūskaņā, sagaidūt vaļsts svātkus i pīminūt cylvākus Ukrainā, kuri jau tyukstūša dīnu nūtur froņtis lineju sovā zemē karā pret Krīveju, saruna ar paleidzeibys kusteibys „Twitter konvojs” koordinatori Lauru Pliču-Stankeviču.Vaļsts svātkūs, 18. novembrī, Reigys pilī Laura sajims vaļsts leluokū apbolvuojumu – Treju Zvaigžņu ordeni.

Laura dzymuse Preiļūs i pabeiguse Preiļu Vaļsts gimnazeju, vāluok studiejuse Latvejis Universitatē ekonomiku, struoduojuse apzaļumuošonā – vadejuse dorbus Mežaparka estradis byuvnīceibys procesūs, pīsadalejuse Kemeru parka rekonstrukcejā, tok niu jau catūrtū godu atteista ari sovu uzjāmumu „Landscape Construction”, i par leluokū lapnumu sauc Uzvarys parka rekonstrukceju.

Paraleli vysu laiku kai Krīveja aizsuoce pylna mārūga karu Ukrainā, Laura ar sovu laiku i energeju paleidziejuse ari ukrainim, pīsadolūt Twitter konvoja kusteibā. „Atguodoju tū dīnu cīši labi. Suocēs kars, vysi bejom taidā drupeit panikā. Pyrmais – ruodejuos, ka tys var atīt ari da myusu. Es dūmuoju – juopaleidz. Kū es varu dareit? Tymā godā tikū kai bejom aizsuokuši uzjiemiejdarbeibu. Kompanejai beja tikai gods, i apzaļumuošonā zīmā nav nimoz tik daudz tuo dorba. Tys beja februars. Es atguodoju – dūmuoju koč kū nūzīduošu ziedot.lv. Īskaiteju vysu, kū varieju. Īvylku elpu, tok taids namīrs īškā, ka tys nav pīteikami.”

I tod Laura tyka Twitter konvojā, kur jū par šoferi rekomeņdēja kaids juos draugs. „Tī tai navarēja vyspuor tikt, i jī ari tai vērēs – meitine niu brauks ar mašynu tik tuoli, aizdūmeigi, tok maņ beja lobs rekomendātuojs, tai jī pajēme mani. Es pīsadaleju twiterkonvojā Nr. 2. Tys beja muns pyrmais konvojs, i 3. martā mes bejom iz Ukrainys rūbeža. Aizvedem tū ūtrū porceju mašynu, i es ari tamā reizē īraudzeju tūs puišus, kas nu froņtis atbraukuši malnom mutem, nateiri i prīcys osorys acīs par tū, ka jī nav palykuši vīni, ka mes jūs atbolstom. Tuos beja taidys šaļts, kurys ruodīs nikod dzeivē navarēs vaira izbeigt redzēt.”