Malēnija voi Maliena Vydzemis austrumūs, Guļbinis i Olyuksna pusē ir Latgolys vīna nu tyvuokūs sābru kulturtelpu, kas vys vēļ dzeivu uztur malēnīšu identitati i pīdareibu sovai dzymtajai pusei, kai ari eipašū volūdys skaniešonu, kas ar sovpateigom lauztajom intonacejom rakstureiga viņ itai pusei. Malēnīšam napateik, ka jū nūsauc par latgalīti, jo jis ir malēnīts, i myusu dīnuos ari lapnais vydzemnīks.
Kaids tod ir malēnīts myusu dīnuos i cik dzeiva ir ituos pusis volūdys sovpateiba, kai teik uzturāta Malēnijis kulturtelpa, kai poši malēnīši izjiut identitati i kai veicynuot pīdareibys sajiutu, par tū runojam ar avīzis “Alūksnes un Malienas ziņas” žurnalisti Daci Plaudi, Olyuksna kulturys centra metodiki, Zīmeru pogosta folklorys kūpys vadeituoju Ilzi Briediņu, Jaunlaicinis muzeja vadeituoju, Malēnijis kulturtelpys puorzynuotuoju Sandru Jankovsku, bīdreibys “Radošie Malēnieši” vadeituoju, Malēnijis pietneicu Santu Usāni i Olyuksna nūvoda pošvaļdeibys Kulturys i sporta nūdalis vadeituoju Sanitu Eglīti.