Lauksaiminīku protesti i izvierzeitūs praseibu pamatuojums, saulis paneļu i vieja turbinu parki Latvejis pīrūbežā, atsasliegšona nu Krīvejis elektroteikla, energeja nu atkrytumu i Nacionalais energetikys i klimata plāns – par klimata i energetikys tendencem regionā saruna ar klimata i energetikys ministru, ari lauksaiminīku, nu Latgolys Saeimā īvālātū Kasparu Melni (ZZS).

Par klimata i energetikys ministru (KEM) Kaspars Melnis tyka nomināts 2023. gods septembrī, tok navar napīsaukt, ka vēļ 2022. gods decembrī jis pats īsastuoja pret itaidys ministrejis sataiseišonu i piečuok par juo īceļšonu ministra omotā kategoriski beja preteimā ari Latvejis dobys aizsardzeibys organizacejis. „Golvonais arguments deļkuo es suokuos beju pret KEM, beja aiz tuo, ka byus klimats i energeja, bet nabyus vidis. Jo vidis bloks ir VARAM. I myusu pastatejums beja – ka mes vodom itū ministreju, vidis blokam juoīt pi myusu, jo kai var byut klimats bez vidis. Mes redzim –

vīns nu tūs leluokūs izaicynuojumu ir lelī energetikys projekti, atjaunojamuo energeja, kas ir viejs, saule i vide. Tys ir vīns nu golvonūs aspektu, i leidza ar tū niu mes asam nūsavīnuojuši, ka da vosorys vyda mes sakuortojam i puorlīkam, i vidis bloks puorīt pi myusu.”

Ari Latgolā i pīrūbežā vys vaira atsateista saulis parki, lels saulis parks atkluots Zylupē, taids plānuots ari Augšdaugovys nūvodā i Bolvu nūvodā pi poša rūbeža ar Krīveju. „Saulis parki ir breineigs davums kai energetiskajā drūšeibā, tai i ekonomikā, saprūtams, tī ir ari sovi izaicynuojumi,” saulis energejis atteisteibu Latgolā viertej ministrys, tymā pošā laikā vieja turbinu parku atteisteibu komentejūt jau daudzi pīsardzeiguok. „Te ir juosoka, ka ar vieja parkim Latgolā byus kai byus. Mes gaidom, kod Aizsardzeibys ministreja publiskuos karti. Jo tei problema, ar kū saīt sasadūrt,

tu vari izprojektēt vieja parku, pabeigt ītekmis iz vidi nūviertiejumus, apsasprīsšonys i golā tev taipat tys ir juosaskaņoj ar Aizsardzeibys ministreju. Tys ir vaļsts drūšeibys vaicuojums.

Jo mes zynim, kaidūs apstuokļūs mes niu dzeivojam, kas nūteik sābrūs. Tys nav nikaids nūslāpums, ka vieja turbinys dora sovys problemys nūvāruošonā i cytuos lītuos.”