Latgalīšu volūda školuos, bārnuduorzūs, vaira informacejis latgaliski plošsazinis leidzekļūs, latgalīšu volūdys specialista daīmameiba kotrā Latgolys pošvaldeibā, atbolsts regiona ekonomiskajai atteisteibai, ceļazeimis latgaliski i oficiali apstyprynuots nūvoda zyli bolti zylais karūgs – tys ir viņ nalels izvylkums nu pyrma gods Rēzeknē Latgolys kongresā sastateituos rezolucejis.
Niu jau pīktū godu ari 27. apreli atzeimojam kai Latgolys kongresa dīnu, par gūdu pyrmajam taida veida kongresam, kas nūtyka pyrma vaira nakai symta godu — 1917. godā, i kur lēme, ka Latgola apsavīnoj ar puorejim nūvodim, veidojūt vīnu vaļsti Latveju. Kai tūlaik, tai ari pārnejuo gods kongresa beiguos tyka izstruoduota rezoluceja, izceļūt svareiguokūs vaicuojumus, pi kuru turpmuokajūs godūs juostruodoj, kab Latgolys  regions atsateistātu.
Kas tod ir izadevs aizvadeituo goda laikā, saruna ar juristu, Latgolys kongresa lāmumu izpiļdis padūmis prīšksādātuoju Agri Bitānu, Latgolys kongresa lāmumu izpiļdis padūmis puorstuovi, reizē i Bolvu nūvoda deputatu ("KONSERVATĪVIE") Aldi Bukšu, Latgolys kongresa delegatu, bīdreibys „Latgolys saeima” vaļdis lūcekli Juoni Žugovu (Nacionālā apvienība).