Pādejuo mieneša laikā Latgolu ir apmekliejuši vairuoku storptautysku organizaceju puorstuovi. Vēļ naseņ ar vītejim pošvaļdeibu vadeituojim i uzjiemiejim sasatyka Eiropys Komisejis i Pasauļa bankys puorstuovi, Ekonomiskuos sadarbeibys i atteisteibys organizacejis (OECD) eksperti, pīrūbežu, tymā skaitā ari Bolvu nūvodu, apmeklēja prezidents, vysaidi ministri, bet jaunnedeļ, kab runuotu par ekonomikys izaugsmi, iz Latgolu brauks ari Latvejis Bankys puorstuovi. Taipat jau dreiži ari Ludzys nūvodu planavoj apmeklēt Latvejis vaļsts prezidents Edgars Rinkēvičs. I vysam tam kluotyn tūp ari reiceibys plāns Latvejis Austrumu pīrūbeža ekonomiskajai izaugsmei da 2027. gods. Daudz vysaidu i ari aktivu reiceibu Latgolys regiona i pīrūbeža atteisteibys veicynuošanai, kas nu tuo teik pošam regionam i vysutuoļuok Latvejis austrumūs asūšajom pošvaļdeibom, sarunā ar Latgolys planavuošonys regiona atteisteibys padūmis i Bolvu nūvoda pošvaļdeibys dūmis prīšksādātuoju Sergeju Maksimovu (Latgolys parteja) i Ludzys nūvoda dūmis prīšksādātuoju Edgaru Mekšu (ZZS).


„Radzūt ari Ukrainys pīredzi, ka mes nagribim īguļdeit niu Latgolys ekonomikā i atteisteibā, nadūd Dīvs, ka var atīt taida šaļts, kod mums byus juoīgulda leidzekli, kab pretuotūs militarai darbeibai, kai tys niu ir Ukrainā, ka nabeja gribiešonys īguļdeit tymūs regionūs, kam rūbeža ar Krīveju, tod niu ir juoīgulda daudz vaira leidzekļu, tuos teritorejis atkarojūt,” soka S. Maksimovs.