Augustā Korupcejis noviersšonys i apkaruošonys birojs (KNAB) rūsynuojs Latgolys tīsys apgobola prokuraturai suokt kriminalvojuošonu pret pīcom Preiļu nūvoda dūmis omotpersonom, tymā vydā i dūmis prīšksādātuoju Marutu Plivdu par dokumentu vyltuošonu personu grupā piec īprīškejas vīnuošonuos. KNAB itū kriminalprocesu suoce jau 2019. gada oktobrī. Lai situacejā, kod asūšajai dūmis vadeibai ir īrūbežuotys tīseibys pījimt lāmumus, dūmis dorbs tyktu turpynuots, Preiļu nūvoda dūmē izveiduots ūtrys prīšksādātuoja vītinīka omots, tī pārnejuo goda novembra beiguos īvālāta Klavdija Zarāne.

Kai šūbreid, jemūt vārā ari ‘Covid-19’ sakarā īvīstūs īrūbežuojumus, dzeivoj Preiļu nūvods, kai rit dorbs dūmē, kaidus dorbus voi naudys pīsaisti KNAB rūsynuotuos kriminalvojuošonys ir ītekmiejušys, kai atsateista vierīneigais Preiļu piļs atdzimšonys projekts, kai ari, kū ness administrativi teritorialuo reforma, saruna ar ituo breiža Preiļu nūvada dūmis vadeibu – dūmis prīšksādātuoja ūtrū vītineicu Klavdiju Zarāni, Preiļu nūvoda dūmis deputatu, uzjiemieju i vīnu nu Preiļu Breivuos školys dybynuotuoju Aigaru Zīmeli, Preiļu nūvoda turisma informacejis centra vadeituoju Ivetu Šņepsti, Preiļu muižys kompleksa i parka vadeituoju Sandu Činguli-Vinogradovu, lauksaiminīkim – Jāni Gavaru i Jāzepu Ivanānu, kurīs dorbojas ari Riebiņu nūvoda dūmē kai prīšksādātuoja vītinīks.

 

Latgolys stuņdē kai īrosts ari aizvadeituos nedelis aktualitatis i gaidomī kulturys dzeivis nūtykumi.

Īsaklausi! Raidam latgaliski!