Jau ituo goda 5. junī piec naseņ nūtikušuos teritorialuos reformys jaunajūs nūvodūs nūtiks pošvaļdeibu vieliešonys. I ituos vieliešonys byutisku nūzeimi pamess na tik viņ iz vītvarom, bet īzeimuos arī jaunus rūbežus. Latvejis Radejis Latgolys studeja turpynoj prīškvieliešonu diskuseju cyklu, kurymā sešu raidejumu laikā izvaicuosim deputatu kandidatu sarokstu liderus voi puorstuovus Latgolys tūpūšajūs nūvodūs, kurūs vysvaira ir ītekmiejuse administrativi teritorialuo reforma.

I itymā nedeļā fokusā jaunveidojamais Rēzeknes nūvods, kas iz prīšku piec vieliešonu apvīnuos Rēzeknes, Viļānu i Varakļānu nūvodus, kūpumā vaira kai 32 tyukstužys īdzeivuotuojus. Iz 19 deputatu mandatu Rēzeknes nūvodā preteņdej 132 kandidati nu sešu parteju, kū itymā raidejumā puorstuov itūs politiskūs parteju ci apvīneibu lideri:

  • Monvīds Švarcs, Jaunā VIENOTĪBA, "Kustība "Par!"", LATGALES PARTIJA,
  • Kaspars Melnis, Zaļo un Zemnieku savienība,
  • Guntis Trupavnieks, Latvijas attīstībai,
  • Ērika Teirumnieka, Nacionālā apvienība "Visu Latvijai!"-"Tēvzemei un Brīvībai/LNNK", Politiskā partija "Latvijas Reģionu Apvienība",
  • Guntis Rasims, Jaunā konservatīvā partija,
  • Jekaterina Ivanova, "Saskaņa" sociāldemokrātiskā partija.

 

Latgolys stuņdē kai īrosts ari aizvadeituos nedelis aktualitatis i gaidomī kulturys dzeivis nūtykumi.