2021. godā izdūtuos “Grāmata par nonullēšanos” autors, “Latvian Art Directors Club” bīdrys, veiksmeigs i pīpraseits, rodūšajā vidē pazeistams reklamys specialists Raimonds Platacis marketinga sferā dorbojās jau 14 godu. 2012. godā kūpā ar partnerim dybynuoja agenturu “Abnormal”, itūšaļt vizionars “3ClientAgency”, vīslektors Latvejis Universitatē, Latvejis Kulturys akademejā, biznesa inkubatorūs. Pandemejis laikā Raimonds piļneibā pamaineja sovu dzeivi, atsasokūt nu cīši daudzi lītu, kai pats tū sauc – nūsanullejūt. Itūšaļt jis nu golvyspiļsātys ir atsagrīzs dzymtajā Latgolā, Rēzeknis apleicīnē, kab ite suoktu nu jauna.

Itūreiz saruna ar Raimontu Plataci par tū, kai jis radz Latgolu i kas, nu marketinga voi reklamys redzīņa verūtīs, itam regionam vajadzeigs, kab pīdzeivuotu izaugšonu i atteisteibu.

“Tys latgalīša spāka punkts ir tei plotuo sirds pret cylvākim, byut atvārtam pret cylvākim, byut dūdūšam, i varbyut dūt vaira nakai tu sajem preteimā. I tei ir ari, es dūmoju, tān latgalīša taida kai identitatis problema. Es tū nūsauktu par problemu tān, varbyut par tū, ka, kod mes īmam pasaulī, Reigā voi uorpus Latgolys ar itū pastatejumu, ka tu ej ar tū plotū sirdi, ar tū atvierteibu, tu saprūti, ka tys pasauļs tai nastruodoj, ka tovu itū spāka punktu, kas ir tei plotuo sirds, uztver par tovu vuojumu i suoc izmontuot,” tai Raimonds Platacis, cyta storpā vaira reižu uzsvārdams, ka napareiza poziceja latgalīšim ir byut uperu lūmā, nu tuos juokuop uorā.

“Mums juosuoc runuot na taidā leiminī, ka mes asam tī pādejī, bet juosuoc saprast myusu spāka pusis i par tom juorunoj.”

Vys tik, kas ir tei Latgolys stypruo puse, tū ari Raimonds vēļ rauga atrast. “Maņ gribīs saprast pošu sakni, kai puorvērst itū vuojuma poziceju par spāka poziceju. Es vīnkuorši raugu saprast, kas eistineibā ir tukšums Latgolā. [..] Kai tū tukšumu puorvērst kai taidu spāka punktu.”

Kai vuoju poziceju Raimonds saskota ari īšonu piec standartizacejis. “Es tān daudz ceļoju pa Latgolu itūs pādejūs godus, runoju ar cylvākim, i es vīnkuorši radzu taidu tendenci – standartizaceja. Mes raugam dabuot tū leimini, tū eiroremonta leimini koč kaidā veidā. Es vīnkuorši radzu, ka mes pagaisynojam sovu identitati, skrīnūt i dūmojūt par tū standartiziešonūs. Ka mes dūmojam par tim standartim, tod mes zaudejam koč kū. [..]

Nivīnam mes naasam vajadzeigi standartiski, mes Latvejai i pasauļam asam vajadzeigi taidi, kaidi mes asam ar tū unikali latgaliskū, i tū nadreikst aizmierst tymā skriejīnī piec tūs augstūs standartu.”

“Maņ cīši pateik tān atsarast ite, Latgolā, par tū, ka es saprūtu tū, ka mes asam tān tymā puormaiņu laikā, kod tu vari īspraust karūgu i pasceit: “Ite itys ir vierzīņs, kur mes īmam!” Par tū, ka tys ir taids atvārts vaicuojums i atvārta situaceja. Maņ tys stuovūklis cīši pateik. Es dūmoju – tys ir cīši ekskluzivi byut ite, Latgolā, itymā pūsmā,” tai Raimonds Platacis.