Niu Latgolys planuošonys regions aptver teritoriju, kurā dzeivoj 16% nu kūpejuo Latvejis dzeivuotuoju skaita kas ir 294 058 cylvāku, i kurā ītylpst septeni nūvodi i divys vaļstspiļsātys, taipat ni mozuok svareigi, ka planuošonys regiona teritorija ir ari Latvejis i ES austrumu rūbeža.
Sovukuort Ministru kabinets ituo gods janvara vydā apstyprynuoja reiceibys planu Latvejis Austrumu pīrūbeža ekonomiskajai izaugsmei i drūšeibys styprynuošonai turpmuokajim 3 godim (2025.–2027. godam). Kūpumā 58 pasuokumim daškierti 644,6 milj. eiro, t.sk. drusku mozuok nakai puse ir vaļsts budžeta finansiejums (269,6 milj. eiro) i leluokuo puse naudys – Eiropys Savīneibys (ES) fondu i cyts uorvaļstu finansiejums (375,0 milj. eiro).
Kaids īguļdejums itaida reiceibys plana sagatavuošonā ir bejs Latgolys planuošonys regionam, kura mierkis ir nūdrūšynuot regiona atteisteibys planuošonu, koordinaceju, pošvaļdeibu i cytu vaļsts puorvaļdis īstuožu sadarbeibu, i ari Latgolys regiona interešu aizstuoveibu vaļsts leimenī? Cik taids plans ir pītuvynuots realitatei, cik tys ir izpyldams, i kaidys problemys var atrysynuot?
Par itim i cytim, tymā storpā bezdorba samazynuošonys i uzjiemieju pīsaistis vaicuojumim sarunā ar Latgolys planuošonys regiona administracejis vadeituoju Ivetu Maļinu-Tabūni, Latgolys planuošonys regiona Atteisteibys padūmis prīšksādātuoju, Bolvu nūvoda pošvaļdeibys prīšksādātuoju Sergeju Maksimovu (Latgolys parteja) i Latgolys planuošonys regiona atteisteibys padūmis lūcekli, Preiļu nūvoda dūmis prīšksādātuoju Āriju Vucānu (Apvīneiba Īdzeivuotuoji/LRA/JKP).