“Rēzekne – bez budžeta un bankrota priekšā”, “'Mazā karaļvalsts' izputējusi. Kas īsti noticis Rēzeknē?”, “Rēzekne turpina grimt parādu purvā” – itaidus viersrokstus medejūs ap Rēzekni pādejā laikā var redzēt vysā bīži. Laikā, kod jau aptyvai godu Rēzeknis piļsāta dzeivoj situacejā, kod par dūmis padareitū, īprīšk pījimtajim lāmumim runoj vaļdeibā, runoj medeji i politiki, kod pošvaļdeibā teik “grīzti” izdavumi i štata vītys, kod deļ lelūs poruodu i aizjāmumu vaļsts kasē ir apturāti atteisteibys projekti i pret niu jau nu omota atcaltū dūmis vadeituoju Aleksandru Bartaševiču aizsuoktys kriminallītys, i jau jaunnedeļ vysa tycamuok Saeima pādejā lasejumā sprīss par vysys vaļstpiļsātys dūmis atlaisšonu, tuos vītā iz godu da jaunu pošvaļdeibu vieliešonu īceļūt treis administratorus, iz sarunu asam aicynuojuši jaunus i aktivus rēzeknīšus, lai nūskaidruotu, kai jī itamā situacejā sasajiut, kū dūmoj par Rēzekni šudiņ i piļsātys atteisteibu iz prīšu. Sarunā pīsadola vītejuo aktiviste Regita Zeiļa, socialais apryupātuojs Artūrs Bondars, uzjiemieja Krista Freiberga, kas īprīškejuos vieliešonuos beja partejis “Saskaņa” sarokstā, i aktiva rēzeknīte Māra Āze, kurei ir ari Jaunuos Konservativuos partejis bīdre.

“Tys ir bejs cīši gars process i vīnā šaļtī, pa manim, es kai rēzeknīte vīnkuorši nu tuo pīkusu i vaira naizsekoju vysam leidza,”

ap ituos šaļts situaceju Rēzeknē soka Regita Zeiļa, izsvarūt, ka vysu laiku ir naziņa, i tei ir leluokuo problema. Tam pīkreit ari Krista Freiberga.  “Nazynuošona ir tys leluokais, kas niu traucej īt iz prīšku.” Taišni naziņa traucej ari uzjiemiejim. “Tys naroda nikaidus lobus prīšknūsacejumus, par pīmāru, ari jaunu investiceju dasaisteišonai.”

“Varbyut tei naziņa ir speciali radeita deļ tuo, lai cylvāki nazynuotu. I ari nikod naīt iz koč kaidu publisku paziņuojumu, kas ir realuo situaceja. Vysod ir koč kaidi populistiski izguojīni, ka myus te niu apmīdz voi, ka mes te vysu dorim, bet ka tai saīt, ka myus apmīdz. Bet es asu partejā i es vysu zynu, kas tī nūteik,” soka Māra Āze. “I deļ tuo es ari asu politiski īsaisteita, lai es saprastu, kas nūteik politikā vyspuor kai taidā Latvejis mārūgā.”

Taipat Regita Zeiļa ap situaceju Rēzeknē soka, ka “vysu laiku kai taida loterejis spieliešona ir bejuse ar tū nanormalū riska uzajimšonu i ticeibu, ka “izsaus”.” Māra Āze tū saista ar Eiropys dūtajom īspiejom. “Kod īsastuojom Eiropys Savīneibā, tod mums atsataiseja itei vareiba, ka mes varim jimt, nasaprūtūt, voi mes varim atpeļneit.

Tys ir breineigi, kai jī izmontuoja tuos īspiejis, bet vīnā breidī jī nasaprota, kur ir STOP zeime, ka tu navari vysu laiku jimt i jimt i koč kū atjaunuot, tev ir juosaprūt, kurs ir tovs primarais objekts, kas tev ir vajadzeigs, kai, par pīmāru, “Gors”.”