Ričards Umbraško: pīrūbeža stuovūklis ir unikals, kurymā byut

Sagaidūt jaunū vuiceibu godu, šudiņ iz Latgolu i pīrūbežu kai regionu pasavērsim ar Harvarda Universitatis 4. kursa studenta Ričarda Umbraško acim. Ričards ir beidzs Reigys Vaļsts 1. gimnazeju, izaudzs goļvyspiļsātā, tok juo seņču pādi dziļai sakņojās Ludzys nūvodā jeb pošā Latvejis-Krīvejis pīrūbežā. Ari pats Ričards, studejūt vacuokajā i vīnā nu prestižuokūs universitašu ASV, ir dagrīzs viereibys sovom saknem.

„Baba Ernestīne, mamys mama ir nu Ņukšu. Tī es asu braucs kotru vosoru bierneibā. Dzeivuojīs tī. I mes ar mamu dzeivojam Reigā. Tok mama vēļ arviņ uztur kontaktus i ari sovu latgaliskū ideņtitati.”

Jis iz pīrūbežu verās kai iz eipašu regionu, pietej saleidzynojūšū literaturu, imperejis i piecpadūmu rūbežus, i naseņ juo vieršonūs iz Latgolu kai pīrūbeža regionu varēja skaiteit ari interneta žurnalā Satori.

„Kod beju mozuoks, es atguodoju, ka mama gribēja, kab es runoju latgaliski, tok es koč kai styurgaļveigi izavaireju nu tuo. I mož niu tei Latgolys pietnīceiba ci interese par Latgolu ir kai atbiļde tam, tai nagribiešonai pyrma tam koč kai saisteit sevi ar Latgolu,mož deļ tuo, ka vuiceitīs latgalīšu volūdu beja gryuši ci ari vīnkuorši nasagribēja. I varbyut es niu koč kai raugu lobuot, dagrīžūt viereibys i akademiski vuicūtīs, i pietejūt Latgolu.”

Ričards pietej, kai cyti autori verās iz pīrūbežu kai regionu. „Tuos pīrūbeža pīredzis koč kaidā ziņā ari ir leidzeigys, ka tys

pīrūbeža stuovūklis ir taids unikals stuovūklis, kurymā byut. Deļtuo ka tys nūzeimoj taidu byušonu storp diveju vītu, ka tu eistai naesi varbyut symtproceņteigi ni vīnā vītā, ni eistyn ari ūtrā vītā. Tu vari dūmuot pats, ka esi vīnā ci ūtrā, tok tys, kai tevi uztver deļ ituos storppozicejis, ir tys, ka tu naesi ni vīns, ni ūtrys. Tod kas tu esi?

Itī ideņtitatis vaicuojumi vysu laiku teik cyluoti, i tī palīk par svareigim tim pošim cylvākim, kuri dzeivoj itymūs pīrūbeža stuovūkļūs.”