„Mums juosuoc dūmuot par tū, kab sabīdreiba palīk aktivuoka”, kai vīnu nu golvonūs mierku par aizvadeitajā nedeļā nūtykušū drūšeibys forumu Kruoslovys nūvoda Indrā nūsauc tuo organizātuoja Kruoslovys rajona partnereibys puorstuove Zane Ločmele.

„Kab vaira mes kotrys dareitu, ryupātūs par sevi, dūmojūt ari par pošvaļdeibu i vaļsti.” Kai ūtru svareigu aspektu vītejuos navaļstiskuos organizacejis, kas ir ari iniciatori itam pasuokumam pošā Latvejis-Boltkrīvejis pīrūbežā, atzeist vajadzeibu pīrūbežam pīsaisteit storptautiskūs i nacionalūs ekspertu viereibu. Dzeivuotuojim ite iz vītys pīrūbežā juonūjam sprīdze, ka par jim itymā geopolitiski sarežgeitajā laikā ir aizmiersts, i ka ite nav drūsai.

„Muna drūšeiba i sarunuos ar cylvākim asu saprotuse, ka kūpīnys nūtureiba veidojās nu tuo, cik cylvāks ir informāts, cik cylvāks ir īinterasāts izzynuot kaidu informaceju, skaidrys, ka par reizi juorunoj i par tū, voi informacejis ir gona.” Zane Ločmele, kai drūšeibys foruma Indrā reikuotuoja skaita, ka dzeivuot viņ dažus kilometrus nu rūbeža ir drūsai, tok vītejim ari byutu juozyna, kas nūteik kūpumā, juopuorzyna civiluos aizsardzeibys plani i tys, kai juosareikoj kaiduos krizis situacejuos.

Nacionaluo drūšeiba ir mejīsadorbuošona storp vaļsti i sabīdreibu, deļtam itaida prakse uzrunuot napastorpynuoti vītejūs dzeivuotuojus ir juoturpynoj, atzeist ari īšklītu ministrys Rihards Kozlovskis (Jaunuo Vīnuoteiba).

„Drūšeiba ir vysaptverūša, drūšeiba nav tikai militarais, drūšeiba nav tikai rūbeža styprynuošona, drūšeiba ir ari par sabīdreibys nūtureibu”, skaita ari Vaļsts kancelejis Strategiskuos komunikacejis koordinacejis departamenta vadeituojs Rihards Bambals. Jis soka, ka sabīdreibys nūtureibu navar styprynuot tikai nu augšys voi ministreju, vajadzeiga sadarbeiba storp institucejom i vītejom kūpīnom.

Par dzeivi, drūšeibu pīrūbežā i sabīdreibys nūtureibu križu gadīņūs, kai ari par tū, kaidi sacynuojumi piec sasatikšonys forumā ar vītejīm dzeivuotuojim ir ekspertim i vaļdeibys puorstuovim, sarunā ar Latvejis Transatlantiskuos organizacejis jeb LATO generalsekretari Sigitu Strubergu, Vaļsts kancelejis Strategiskuos komunikacejis koordinacejis departamenta vadeituoju Rihardu Bambalu, Īšklītu ministru Rihardu Kozlovski (Jaunuo Vīnuoteiba), kai ari bīdreibys „Kruoslovys rajona partnereiba” puorstuovi Zani Ločmeli.