Tikū atsagrīzuse nu Pasauļa čempionata vīglatletikā, jau gatavejās jaunim leluokim i mozuokim startim, sprintere Gunta Vaičule sovu pyrmū Latvejis čempionis titulu dabuoja jau 10. klasē piec dažu mienešu treneņu, deļtuo, aizsuocūt jaunū vuiceibu godu, jei īdrūsynoj vysus ticēt sev i sovim izvierzeitajim mierkim.

Itūreiz raidejumā saruna ar Guntu par dzeivi, sportu i jaunīšim, par tū, kur dabuot spāku i īdviesmi, kai izvierzeit mierķus i voi Latgolā atsateisteit par profesionalu sportistu ir norma voi izjāmums.

Gunta Vaičule sovu spāku ir atroduse sprinta distaņcēs 200 m i 400 m i jau 11 reizis bejuse Latvejis čempione vīglatletikā, lobuojuse Latvejis rekordu 400 m skriejīnī telpuos, bejuse Eiropys čempione, startējuse ari olimpiskajuos spēlēs i itūšaļt ir Latvejis Olimpiskuos komitejis Atletu komisejis vadeituoja.

Gunta pīzeist, ka niu Latvejā sprintā ir moz konkurencis i deļtuo ir gryušuok sasnēgt arviņ lobuokus rezultatus. “Teiri emocionali i psihologiski ir daudz leluoka vareiba sasnēgt lobuoku rezultatu, kod tu esi lobā konkurencē, i tys ir tys, ar kū maņ ir juoizteik Latvejā, ka tuos konkurencis maņ nav, bes es saprūtu, cik svareigi byutu, ka konkurence byutu. Deļ tam, saprūtams, ka es grybātu vaira dreižus sprinterus.” Taipat jai ruodīs, ka leluoku, tymā vydā Latgolys, puorstuoveibu lelūs forumūs i vaira Latvejis čempionu dūtu maneža Latgolā.

“Rēzeknē, Daugovpilī, Latgolā maneža byutu bejuse vajadzeiga jau pyrma 20 godu. I maņ cīši suop sirds, ka mums Latgolā nav nivīnys manežys i principā taidu pīkluojeigu treneņa apstuokļu.”

Jei dūmoj, ka tam ir ari cytys tuoļuok īmūšys sekys, par pīmāru, treneru tryukums. “Datryukst motivacejis jaunajim trenerim, jo nav kur trenētīs. Stadionā Latvejis apstuokļūs trenētīs var viņ sešus mienešus godā.”