Pādejuos nedeļuos socialajūs medejūs apsprīstys bažys par Latvejis Muokslys akademejis (LMA) Latgolys filialis Rēzeknē liktini. Filialis darbinīki i vadeiba atkluotajā viestulē aizstuov filialis pastuoviešonu iz prīšku, savuocūt ap 200 parokstu. Akademejis rektors meklej atbolstu pi Senata i kūpeigi roksta prezidenta kancelejai par problemom Latvejis Muokslys akademejā. Īmeslis – nasaprasšonuos ar akademejis padūmi i konkretuok padūmis prīšksādātuoju Valtu Ernštreitu. Vīns nu streida uobuļu ir ari akademejis Latgolys filiale, tuos nuokūtne.


Par konkretū streidu, par Latvejis Muokslys akademejis nuokūtni i tagadni raidejumā saruna ar Muokslys zynuotneicu, lektori LMA Latgolys filialē Eviju Vasilevsku i LMA Latgolys filialis absolventi, Rēzeknis Muokslys i dizaina školys vadeituojis vītineicu Kristīni Binduku. Sovu redzīni ap LMA rodūšū streidu i Latgolys filialis nuokūtni atkluoj ari LMA Latgolys filialis vadeituoja Dana Zelča, LMA rektors Kristaps Zariņš i LMA padūmis prīšksādātuojs Valts Ernštreits.