Naseņ Latgolys turisma asociacejis veiktuo nūzaris uzjiemieju aptauja paruoda, ka vaira nakai puse turisma pakolpuojumu snīdzieji Latgolā itūgo cer iz taidu pošu pīprasejumu kai pārnejā godā, 15% nūruodejuši, ka pīprasejums ir sasamazynuojs i tikpat dūmoj, ka pīprasejums byus pat leluoks.

„Skaidrs, ka kotru godu mes ceram iz tū lobuokū, tok sovi izaicynuojumi vysod ir. I priņcipā itūgod taipat Latgolys regiona turisma nūzarei prīškā ir daudz izaicynuojumu,” raidejumā soka Rēzeknis turisma atteisteibys centra i ari Latgolys turisma asociacejis vadeituoja Jeļena Kijaško.

Par tū, kai itymūs geopolitiskajūs apstuokļūs niu dzeivoj Latgolys turisma pakolpuojumu snīdzieji i uzjiemieji, kaidus laikus nūzare kūpumā hibridkara apstuokļūs puordzeivoj, raidejumā runojom ar Ludzys nūvoda turisma informacejis centra vadeituoju, Ludzys amatnīku centra puorstuovi, i Leluo latgaļu tierga reikuotuoju Līgu Kondrāti, turima objekta - zyrgu sāta „Klajumi” Kruoslovys nūvodā - saimineicu, vaļdis lūcekli bīdreibā „Eiroregions „Azaru zeme”” Ilzi Stabulnieci i turisma specialistu, BalticTravelnews vadeituoju Aivaru Mackeviču.

„Itūgod sezona īsasuoce cīši lānom i pamozom. Ir mozuok apmeklietuoju i turistu, mozuok interesentu. Nui, grupys pīsasoka, pīsasoka ari saimis, tok tymā pošā laikā mozuok ir, stypri mozuok. Palykuse nu vysim, kas beja ogruok, niu apmāram trešdaļa,” ituo goda aktivū turisma sezonu raksturoj Līga Kondrāte.

Tū, ka cylvāki palykuši izvieleiguoki i reizem vaira izavielej braukt navys koč kur Latvejā voi Latgolā, bet tuoļuokus braucīņus iz cytom vaļstim, aplīcynoj ari Ilze Stabulniece. „Tai kai asom seniori i gona pīredziejuši turismā, mes zynom, ka daz Juonim nikod nav bejs cylvāku, i ka jī troki palīk viņ augustā, tod, kod jau sezona īt iz beigu.”

Tendeņce, kū īzeimēja pandemejis laiks, kod Baļtejis vaļstu ceļuotuoji par golamiekim izavēlēja sābru valsts, sasagloboj ari niu, nu savys pusis aplīcynoj Aivars Mackevičs. „Tei statistika sasaglobuoja ari pārnejā godā, ka vysvaira Latveju apmeklēja taišni igauni i lītuvīši, i tikai tod nu tuoļuokom vaļstim. Otkon attīceibā iz Latgolu tei diskuseja vysu laiku ir ari par drūšeibu.” Kai vīns nu golvonūs izaicynuojumu Latgolā – turisma plyusma, kas mainejusēs, jemūt vārā geopolitiskū situaceju.

„Taišni tys ari ir vīns nu myusu izaicynuojumim, atrast cytu i aizvītuot tū nišu turisma tiergā, kuru mes zaudiejom. Deļ tam, ka eistineibā Krīvejis turisti myusim pyrma tam beja ap 30 %,” soka Jeļena Kijaško.