Uzjiemieji: minimaluos olgys ceļšona radeis vēļ leluoku plaisu centra i regionu vydā

Minimaluos olgys mierkis ir pasorguot darbinīkus nu cīši zama atolguojuma, tys var byut ari vīns nu politikys elementu, kab īveiktu nabadzeibu i samazynuotu navīnleidzeibu. Nu 2021. goda 1. janvara mieneša bruto minimaluo olga Latvejā ir 500 eiro. Itūšaļt Lobkluojeibys ministreja pīduovoj minimalū olgu vaļstī dasaisteit pārnejuo goda videjai olgai, nūsokūt minimalū olgu 50 % lelumā nu īprīškejuo goda videjuos atleidzeibys vaļstī. Tai 2023. godā minimaluo olga varātu byut da 640 eiro.

Latvejis Dorba devieju konfederaceja itaidā ministrejis pīduovuojumā saredz par daudzi lelu liecīni minimaluos olgys palelynuošonā. Kai Dorba devieju konfederaceja, tai uzjiemieji tur, ka mazynuot nabadzeibys ryskus i navīnleidzeibu var ari cytaidā ceļā, par pīmāru, car nūdūkļu politiku, kai ari veicynojūt dorba ražeigumu. Taipat uzjiemieji Latgolā izsoka redzīni, ka minimaluos olgys ceļšona vaļstī ir politiskys sūļs, kam nav eistyna ekonomiska pamatuojuma, i tys var radeit vēļ leluoku plaisu golvyspiļsātys i regionu vydā.

Par tū, kai minimaluos olgys ceļšona Latgolā varātu atsasaukt iz dzeivis leimiņa pasaceļšonu, uzjiemiejdarbeibys vidi i biznesa atteisteibu, raidejumā runoj AS “Preiļu siers” vaļdis prīšksādātuojs Jāzeps Šņepsts, SIA “Nemo” vaļdis prīšksādātuoja Inga Zemdega-Grāpe, Nūdarbynuoteibys vaļsts agenturys Rēzeknis filialis vadeituoja Ināra Ducsaliete, Darba devieju konfederacejis Latgolys regiona koordinators, Rēzeknis piļsātys dūmis deputats Juris Guntis Vjakse (īvālāts nu apvīnuotuo saroksta “Nacionālā apvienība “Visu Latvijai!”-“Tēvzemei un Brīvībai/LNNK”, Latvijas Zaļā partija, Jaunā VIENOTĪBA, “Latvijas Reģionu Apvienība”, LATGALES PARTIJA”) i Latgolys planavuošonys regiona Atteisteibys Padūmis prīšksādātuojs, Bolvu nūvoda dūmis prīšksādātuojs  Sergejs Maksimovs (īvālāts nu “LATGALES PARTIJA”).