Raidejuma “Latgolys stuņde” gosts Daumants Pfafrods ir inženers, uzjiemiejs, sovulaik bejs Leivuona stykla fabrikys golvonais konstruktors, i nu 1983. gods nūsadorboj ar optiskūs škīdru ražuošonu. 2004. godā sataiseja uzjāmumu SIA “Z-Light”, itūšaļt SIA “Light Guide Optics International”, kas Leivuonā ražoj optiskuos škīdrys i mehaniskuos komponentis.


Daumants Pfafrods ir Leivuona gūda piļsūņs, kuram jau pyrma desmit godu itaids statuss daškierts par izcileibu uzjiemiejdarbeibā, zīduošonys tradiceju izkūpšonu i par vuiceibu stipendeju fonda dybynuošonu Leivuona nūvoda jaunīšu studejom augstškoluos i Leivuona nūvoda stipendeju fonda darbeibu daudzu godu garumā.


Uzjiemiejs ir puorlīcynuots, ka izgleiteibys daīmameibai ir cīši svareiga nūzeime, jo regions navar atsateisteit, ka ite nav kvalificāta dorbaspāka:


“Lela daļa jaunīšu, kuri īt pi myusu struoduot, vuicuos voi ir pabeiguši vītejū – regionalū augstškolu. Par pīmāru, pietnīceibys nūdaļa, kas mums ir cīši spieceiga i, var saceit, izcyli struodoj, tī ir jaunīši, kuri pabeiguši Latvejis Universitatis Fizikys nūdaļu kai fiziki, pietnīki. Tī ir golvonī ļauds, kuri vierzej produktu i tehnologeju atteisteibu uzjāmumā. Mums nav vajadzeibys piec uorvaļstu specialistu.”

Daumants Pfafrods ar sovu uzjāmumu “Light Guide Optics International” pīruoda, ka, atteistūt optiskū škīdru tehnologejis, ari Latvejā var ražuot unikalus, augstys pīvīnuotuos vierteibys produktus, kas izmontojami kai ryupnīceibā i kosmosa industrejā, tai ari medicinā.