Pret ‘Covid-19’ izsuokts vakcinēt seniorus vacumā viers 70 godu i vakcinacejis procesā īsaisteiti ari vairuok nikai 500 saimis uorstu. Tok Latgolā vēļ arviņ izaplota dažaidi miti, deļkuo prioritarūs grupu puorstuovi nu vakcinu atsasoka. Kai vadās ar senioru vakciniešonu Latgolā, raidejumā izvaicojam socialuos apryupis centra “Malta” vadeituoja vītineicu Annu Beitāni, Latvejis Lauku saimis uorstu asociacejis vadeituoju Līgu Kozlovsku, Zuoļu vaļsts agenturys Zuoļu registracejis departamenta vadeituoju Elitu Poplovsku. Raidejumā pīsadola ari vakcinacejis biroja komunikacejis konsultante Agnese Strazda.

Agnese Strazda atzeist, ka Latgolā vakcinai pīsasoka pasivuok nakai cytūs regionūs. Deļkuo tai? Latvejis Lauku saimis uorstu asociacejis vadeituoja Līga Kozlovska atkluoj, ka Latgolā cikom tikai 30 % saimis uorstu īsasaistejuši vakcinacejis procesā. Vairuoki vakcinacejis kabineti atvārti obejuos regiona lelajuos piļsātuos – Daugovpilī i Rēzeknē –, deļtuo vairums izavēlējuši vakcinu sajimt tī. Vys tik lauku seniorim, kas poši sovim spākim leidz piļsātom naspiej tikt, juosagrīž pi saimis uorstu, kas paleidzeibu gaida nu vaļsts i pošvaļdeibu.  Mitus par dažaidu izgatavuotuoju vakcinom klīdej Zuoļu vaļsts agenturys puorstuove Elita Poplavska. Jei noruoda, ka “Sputnik” vakcina patīseibā ir leidzeiga “Astra Zeneca” vakcinai. Taiši itū vakcinu itūnedeļ sajiemuši ari vaļsts socialuo apryupis centra “Malta” klienti i darbinīki, tai nūruoda Anna Beitāne. Interese gon cikom vēļ moza, nūgaideit īsoka ari senioru radinīki.

Latgolys stuņdē kai īrosts ari aizvadeituos nedelis aktualitatis i gaidomī kulturys dzeivis nūtykumi.