Itamā nedeļā Latgolā iz vairuoku dīnu gasteja vaļsts prezidents Edgars Rinkēvičs. Pyrmūdiņ sasatikšona ar vītejūs varu puorstuovim, uzjiemiejim, školānim i školu puorstuovim, i instituceju vadeituojim prezidentam beja Daugovpilī, kur ari vītejim dzeivuotuojim beja vareiba sovus vaicuojumus aizdūt prezidentam personeigi, ūtardiņ prezidents beja Augšdaugovys nūvodā, bet pīktdīnē Rēzeknē prezidenta dorbu plānā Zemissardzis 3. Latgolys brigadis štaba apmekliejums, militaruos padūmis sēde i sasatikšona ar austrumu pīrūbeža pošvaļdeibu vadeituojim.

Ar prezidentu Edgaru Rinkēviču Latgolys stuņdē runojam par nūskaņuojumu i škeļšonūs Latgolys sabīdreibā, par tū, kū vaļsts var i dora, kab dzeivi hibridkara apstuokļūs Latvejis, ES i NATO pīrūbežā uzlobuotu, par lojalitatis styprynuošonys īspiejom Latgolys leluokū piļsātu politiskajā vadeibā, par tū, kaidim juobyun sūlim, kab vaļstī veiduotūs vīnmiereiga regionu atteisteiba i nu Latgolys regiona dzeivuotuoji na brauktu paceli, bet grybātu ite atsagrīzt i palikt dzeivuot, kam byutu juonūteik, kab Latgolys regions mozuok tyktu stereotipizāts i stigmatizāts, bet calta regiona dzeivuotuoju i uzjiemieju pošapziņa.

„Voi tī byutu šyušonys voi kūkapstruodis uzjāmumi, ari, saceisim, ceļtnīceibys i augstūs tehnologeju uzjāmumi, tyss vyss ir ite, vīnkuorši šaļtim mes varbyut asam dajiukuši pi tuo, kas mums ir, i nanūviertejam da gola. I mes vysod gribim koč kū lobuoku. Tys ir labi. Bet Latgola ir naatjemama ari Latvejis ekonomikys sastuovdaļa,” tai vaļsts prezidents Edgars Rinkēvičs.

„Es dūmoju, ka tys, kas mums niu ir doroms, vysa pyrma, paruodeit pošim sev, myusu sabīdruotajim, potencialajim investorim, kurī itūšaļt dūmoj, kū dareit, voi īguļeit ite voi nā, ka ite byus drūsai, i ka ite ir vārts īt.”

Taipat ar vaļsts prezidentu runojam par tū, kaida ir latgalīšu volūdys i kulturtelpys vīta i lūma, i kas ir regiona „zalts” atsateisteišonai iz prīšku.

„Mums eistyn ir juosaver, kai paleidzēt školuos uzturēt kai Latgolys viesturi, tai latgalīšu literaruo montuojuma kūpšonu, i ari pošu volūdys paveidu. Voi i kai tū var izdareit, tys lelā mārā byus atkareigs nu tuo, cik poši ļauds ite ir gotovi tū dareit, cik entuziastiski ir školuotuoji, i tod jau, saprūtams, es dūmoju, vaļsts atbolsts tam sekuos,” tai Edgars Rinkēvičs.

„Zynit, kas ir pats breineiguokais, kū Latgola dūd Latvejai? Tys nav ni muols, ni lyni. Eistineibā, tys, kū varbyut sovu reizi daudzi skaita kai zaudiejumu, kam cylvāki bīži viņ 21. godusymtā daudz puorsavītoj, daudz maina dzeivisvītu, bet es saceitu – Latgolys cylvāki ar sovu cīši, cyta vydā, styngrū raksturu, sovureiz pozitivā nūzeimē, taidu speitu. I pasaverit, kur tik jūs nav, pasaverit, kū tik jī nav davuši myusu vaļsts atteisteibā.”