Raidejumā “Latgolys stuņde” intervejā ar veseleibys ministri Ilzi Viņkeli puorrunuojom nūzaris aktualitatis, jo eipaši veseleibys apryupē regionūs. Itūšaļt aktuals ir vaicuojums par slimineicu leimiņu i snāgtūs pakolpuojumu puorsavieršonu.

 
“Latgolā īsazeimej divi leli spālātuoji – Rēzekne i Daugovpiļs, kas atsateista i specializej sovuos sferuos, i eipaši nokoņkurej sovā vydā. Kluot vēļ tepat ir ari Jākubpiļs, kas ari ir spieceigs atbolsta punkts I tod ir mozuos – trešuo, ūtruo i pyrmuo leimiņa slimineicys. Par pīmāru, Preili radz gona skaidri sovu vītu, kas jim byutu atteistoms, nu kuo jī var atsasaceit. Leivuons cīši labu īspaidu pamete sarunuos, kas nūtykušys ar ministreju. Ari ministreja itymuos slimineicys piļneigi nūteikti finansiali veicynuos i motivēs apryupis pakolpuojumu atteisteišonu, terapejis gultys. Tys, kū mes redzim, ka pošu reizi ir pīpraseits – terapejis, internuo medicina. I tod vēļ plus apryupis gultys, hroniskūs pacientu apryupe i, saprūtams, ari paliativuo apryupe i rehabilitaceja. Tei byutu itūs, zamuokuo leimiņa slimineicu, veiksmis formula, iz kū jī var specializētīs i kur dorbs byus.”
 

Ministre nūruoda, ka nivīnu slimineicu naslēgs, ari Latgolā, i nivīnai slimineicai, koč ari puorstrukturēs pakolpuojumus, naudys nūst najims.

 
“Itei slimineicu izviertiešona nav dūmuota deļtuo, kab ītaupeitu, bet deļtuo, kam mes varim racionaluok, tuo vyda ari mediķu resursus, izmontuot,” tai Ilze Viņkele.


I kai īrosts “Latgolys stuņdē” aizguojušuos nedelis aktualitatis i gaidomuos kulturys dzeivis nūtikšonys.

Īsaklausi! Raidam latgaliski!