14. Saeimys vieliešonu prīškvokorā par piļsūnyskū atbiļdeibu, par kriterejim, ar kaidim apsabruņuot, īmūt vēlēt jaunus Saeimys deputatus, saruna ar režisoru Viesturu Kairišu, kurs, koč i struodoj Dailis teatrī, lelu daļa laika pavoda Latgolā i ari Saeimys vieliešonuos sovu izvēli planavoj dareit taišni Latgolys vieliešonu apgobolā.

“Maņ ruodīs, ka vajag maineit koč kū itymā pasaulī, i tu vari tū izdareit ar sovu bolsu. Vīns bolss – tys ir spāks! Latgolai vysod puormat prokrīvisku i naaktivu poziceju. I tū vajag lauzt. Latgola daudzūs aspektūs ir vysu progresivuokais Latgolys regions, tymā skaitā, ka mes dūmojam par sovu identitati i mes daudzi eistyn skali ceļam bolsu, kod īsastuojam par latgalīšu tīseibom, i cīši asam naapmīrynuoti, ka myus tur par separatistim voi koč kaidim slaviskim latvīšim. Mums Latgola ir juosakuortoj pošim. I vīns nu aspektu, kai tū izdareit, ir aktivi pīsadaleit vieliešonuos – kai municipalajuos, tai Saeimys vieliešonuos. Tys ir cīši svareigai! Par tū, ka latgalīšim ir sovs styngrys bolss.

Es vysod raugu bolsuot Latgolā par tū, ka es verūs iz vieliešonom nu cīši vīglys pozicejis. Nu Latgolys pozicejis i nu Latgolys kongresa nūspraustūs poziceju. Maņ ir svareigi, ka es grybu sovu bolsu atdūt par tim, kuri rysynoj voi atteista Latgolys kongresa nūlyktuos idejis, kurys mes par pīci godi puorsaveram, bet tam pamats ir 1917. goda Latgolys kongress.”

Viesturs Kairišs, izdorūt izvēli, cīši aicynoj vērtēt kotru deputata kandidatu i juo leidzšinejū i īspiejamū davumu Latgolys kai regiona atteisteibai iz prīšku.

Juosoka, ka ir gryuts byut latgalīšu deputatam par tū, ka nu juo ir dubultuo atbiļdeiba. Jam juoatbiļd par vysom vaļstiskajom lītom, bet paraleli jam vyss juodora, kab mums atdzymtu latgalīšu kultura, volūda i vyspuor Latgola kait aida, kab atdzymtu.