Pārnejā godā plotu rezonansi socialajūs teiklūs izsauce dokumentals video dorbs “Daugavpils – iespēju vai nespēju pilsēta?”, kura autore Vladislava Romanova naviņ taidā veidā aizdeve vairuokus naārtus vaicuojumus par sovu dzymtū piļsātu, bet ari nūruodeja iz Krīvejis propagandys i dezinformacejis pamastū īspaidu iz ūtrys leluokuos Latvejis piļsātys dzeivuotuoju dūmuošonu, sabīdreibybs škeļšonūs. Piec filmys izīšonys Vladislava sajēme cīši daudz osu i pat vardarbeigu komentaru, vys tik, nasaverūt iz tū, sasadorbojūt ar portalu lakuga.lv, ituo gods suokumā aizsuokts jaunu raidejumu cyklys “Latgolys revizeja”, kur pyrmajā raidejumā Vladislava revidiejuse tū, voi vīgli byut jaunīšam Daugovpilī i Latgolā.
“Mes vīnkuorši naasam tymūs burbuļūs, bet ir cīši daudz jaunīšu kūpīnu i daudz jaunīšu taišni taidu kai politiskūs kūpīnu, kur jī runoj par politiku, kur jī gatavejās par koč kū protestēt, kur organizej, sasalīdej i vysa kū rauga ari atteisteit. [..]

Jī ir, es pat saceitu, ka jūs ir daudz, pat daudzi vaira nakai varātu īsadūmuot. Tī vysi cylvāki ir īinteresāti paceļt Latgolu nu ceļu. Stuosts par tū, deļkuo mes jūs naredzim, ir aiz tuo, ka Latgola ir stuosts par burbulim.”


Jaunais raidejumu cyklys teik tytrāts ari latgaliski. Vladislava soka: “Maņ beja svareigi, lai cylvāki ari radz, ka latgalīšu volūda vyspuor eksistej. [..] I tei ir tei līta – latgalīšu volūda školuos – ar kū maņ grybātūs, lai teik aizvītuota tei poša krīvu volūda, jo mes dzeivojam Latgolā.”
Par burbulim i jaunuotni, par krīvu volūdu i latvīšu volūdys vidi Rēzeknē i Daugovpilī, par izgleiteibu i školuotuojim, par LGBT+ kūpīnu regionā i par tū, kas goda laikā pasamejs Latgolā i Daugovpilī, sarunā ar filmys “Daugavpils – iespēju vai nespēju pilsēta?” autori Vladislavu Romanovu, kura niu struodoj pi raidejumu cykla “Latgolys revizeja”.