Eistynojūt reformu augšuokajā izgleiteibā, iz prīšku vaļsts dybynuotuos augstškolys tiks īdaleitys četrūs tipūs — zynuotnis universitatis, muokslu i kulturys universitatis, lītiškūs zynuotņu universitatis, kai ari lītiškūs zynuotņu augstškolys. Taipat atbiļdeiguo ministreja itūnedeļ viesteja par lāmumu reorganizēt Daugovpiļs Universitati i Rēzeknis Tehnologeju akademeju, tuos apvīnojūt, kai ari davīnuot Līpuojis Universitati kaidai cytai zynuotņu universitatei. Reorganizacejis planu vaļdeibā Izgleiteibys i zynuotnis ministreja īsnēgs da jauna vuiceibu goda.

Kū par Latgolys augšuokuos izgleiteibys īstuožu prīškdīnom i tū, voi Latgolā iz asūšuos bazis varātu iz prīšku tikt taiseita jauna vaļsts augstškola, raidejumā saruna ar Daugovpiļs Universitatis zynuotņu prorektoru Arvīdu Barševski i Rēzeknis Tehnologeju akademejis rektori Ivetu Mietuli.