Atzeimojūt Luočplieša i vysu Latvejis breiveibys ceiņuos krytušūs varūņu pīminis dīnu, 103. godadīnu nu naatkareiguos Latvejis armejis uzvarys par Rītumu breivpruoteigūs armeju aba tai sauktū Bermonta karaspāku 1919. gods 11. novembrī, itūreiz raidejumā par zemissardzi Latgolā, kaidu īspaidu iz zemissardzē īsastuot grybātuoju daudzumu pamets Krīvejis suoktais kars Ukrainā i cik moderni apreikuota šudiņ zemissardzis brigade ir Latgolā. Juopīzeimoj — itūgod vaļsts svātku paradē taišni Latgolys Zemissardzis brigadei iztycāts nest vysys Zemissardzis karūgu.

Studejā Zemissardzis 3. Latgolys brigadis štaba prīšknīks pulkvežleitnants Oskars Purmalis i Inženeru rūtys viersseržants Jānis Vilkājs.